ནམ་ཡང་བརྗེད་མི་སྲིད་པའི་གོད་ཆག ལྡན་མ། ཚུལ་ཁྲིམས་ཕུན་ཚོགས།

སྔོན་ལས་ཟབ་མོས་ཡུལ་ཁམས་གཅིག་ཏུ་འདུས།།
འབྱུང་བའི་མཚོན་གྱིས་ཚེ་སྲོག་གྲངས་མེད་འཕྲོག།
འདས་པའི་གོད་ཆག་ཡིད་ལ་ཤར་བའི་ཚེ།།
ཟས་དང་གཉིད་ལའང་ལོངས་སུ་སྤྱོད་འདོད་བྲལ།།

རང་ཡུལ་མི་འདོད་བཞིན་དུ་བསྐྱུར་བྱས་ཏེ།།
རང་ལུས་འཕགས་པའི་ཡུལ་དུ་གནས་ན་ཡང་།།
རང་ཉིད་སྡུག་བསྔལ་གསུམ་གྱིས་མནར་བཞིན་དུ།།
རང་སེམས་དབང་མེད་ཁྱེད་ཚོའི་ཕྱོགས་སུ་རྩེན།།

ཆོལ་སུམ་སྤུན་ཟླ་གྲངས་མེད་སྐད་ཅིག་ལ།།
འཛོམས་ཏེ་ཤི་བོ་རྣམས་ལ་བསྔོ་སྨོན་དང་།།
ཤུལ་ལུས་རྣམས་ཀྱི་ཚེ་སྲོག་མྱུར་སྐྱོབས་སོགས།།
ཉིན་མཚན་འབད་པའི་དཀའ་དྲིན་བརྗེད་ཐབས་བྲལ།།

གངས་ཅན་པ་ཡི་རིགས་སུ་གཏོགས་པ་ཡི།།
སུ་དང་གང་ཞིག་རྐྱེན་ངན་གྱིས་མནར་ཚེ།།
ཤ་ཁྲག་རུས་རྒྱུད་གཅིག་པའི་སྤུན་ཟླ་ལས།།
མགོན་སྐྱབས་དཔུང་གཉེན་བྱེད་མཁན་སུ་ཡང་མེད།། 

རྒྱང་རིང་ས་མཐར་ལྷུང་བའི་བུ་ཆུང་ངས།།
རང་རིགས་སྤུན་ཟླ་ཞེན་མདངས་དཀར་ན་ཡང་།།
ཁ་བའི་ལྗོངས་སུ་སླེབས་ཐབས་བྲལ་བས་ན།།
སྙིང་གཏམ་སྨྱུ་གུའི་སོ་ཁར་དྲངས་ཏེ་ཕུལ།།
༢༠༡༡་༤་༡༤་ཉིན་རྗེས་དྲན་དུ།