Monday 14 January 2013

༼ དེང་དུས།༽ བདེ་ལེགས་རིགས་པའི་རལ་གྲི།




གང་ཞིག་སྣང་བས་སྤྲོས་བའི་འཇིག་རྟེན་འདིར།།
མ་རིག་རྨོངས་བས་སྐྱེད་པའི་ཀླད་གསར་པ།།
གང་ཤར་གནས་ལུགས་འཇོག་བའི་མཆོག་འཛིན་གྱིས།།
བདེན་མཐའི་ཡུལ་ལ་འཇུག་པའི་དཔྱད་སྒོ་བསལ།།

གང་ཞིག་ལྷན་སྐྱེས་སེམས་ཀྱི་མཁའ་དབྱིངས་ངོས།།
གནས་ལུགས་ཚེས་རིས་ཟླ་གཟུགས་ཤར་ཀྱང་རུང་།།
ཞེན་ཆགས་ཆུ་འཛིན་སྨུག་པོ་འཁྲེགས་པས་ན།།
བདེན་མཐའི་འོད་སྣང་འཕྲོས་པའི་སྐལ་བ་ཡལ།།
༈དེ་ཡང་དེང་སང་མཆོག་འཛིན་གྱི་མི་ཚེ་ཁྲོད་ནས་དཀའ་སྡུག་དང་འབད་བརྩོན་རི་བོ་བཞིན་སྤུངས་ནས་འདུན་མ་འཚོལ་མཁན་ཚོས་སྔོན་དུས་ཀྱི་ལོ་པཎ་དག་གི་ཁ་བ་གངས་ཅན་ལྗོངས་འདིར་སྙིང་རྗེ་དང་བརྩེ་བས་སྐྱོད་པའི་ལྟ་གྲུབ་དང་བསམ་བློའི་ཀུན་སྤྱོད་ལ་སྒེར་དཔྱོད་དང་ཀླད་རྙིང་པའི་ཕྱོགས་འཛིན་གྱི་རིང་ལུགས་སུ་ཕུད་ནས་ཕྱོགས་འཛིན་དང་ཞེན་ཆགས་ཇི་རྒྱས་སུ་སྐྱོད་པ་ལ་བསམ་གཞིགས་ཅིག་ཞིབ་ཏུ་གཏད་ན་སྔོན་ཆད་མ་བྱུང་བ་ཡང་འདིར་བརྗོད་མེད་ཅེས་ལ་ལྟར་བདེན་དོན་དཔྱོད་པས་བསུ་བའི་རྙེད་དོན་དང་དཔྱོད་བྱེད་ལ་མཆོག་འཛིན་གྱི་ལྟ་བ་དང་མཆོག་འཛིན་གྱི་གཏན་ཚིགས་ཀྱིས་ཚབ་མི་འགྲོ་པའི་འདུ་ཤེས་དང་ལྟ་གྲུབ་ཞིག་རྙེད་ངེས།།

སྔོན་བྱོན་མཁས་པའི་སྲོལ་ལ་ལོག་འཛིན་མེད།།
དེང་དུས་མཆོག་འཛིན་ཕྱོགས་ལ་ཞེན་པ་དབེན།།
བདེན་པའི་གནས་ལུགས་བསྙེགས་སའི་དབེན་ཁྲོད་ནས།།
མི་ཚེའི་འདུན་མར་བརྩོན་ལ་སྤྲོ་བས་ཁེངས།།

མཐོན་པའི་གདན་ལ་རེ་བའི་ཞེན་ཆགས་མེད།།
རང་ཉིད་དམན་ལ་ལྟ་བའི་ཁེངས་སྐྱུང་དབེན།།
ཆོས་མཐུན་བཤེས་གཉེན་བརྩེ་བའི་དྲོད་ཁོལ་འོག།
གཏན་གྱི་འདུན་མར་འཚོལ་ལ་དགའ་བས་གང་།།

སྐྱོ་སེམས་རྒྱ་མཚོ་ངོས་ནས་སྐད་ཆའི་རློབས་ཕྲེང་ཐེངས་གཉིས་པའོ།།

Sunday 13 January 2013

དེ་རིང་གི་བསམ་བཞིག བདེན་དོན་འཚོལ་བ།



མི་ཚེ་མྱུར་བགྲོད་གློག་གི་ཟླ་བོར་འོས།།
སྲོལ་རྒྱུན་ལྕགས་རི་ངམ་གནག་རྔམ་ཤིང་བརྗིད།།
ཕྱི་བཤོལ་འདུ་འཛིའི་རྣམ་རྟོག་རླུང་གིས་གཙེས།།
དཔེ་མང་བརྩེགས་པའི་ཕྱོགས་སུ་དཀའ་བ་སྟོང་།།

ཐོས་བསམ་དྲོད་ཀྱིས་མ་བསྐྱངས་ཞིང་ས་རུ།།
ཉམས་རྟོགས་མྱུ་གུ་འབུས་པར་རེ་བའི་སྲོལ།།
མ་ཐེགས་བཙན་གྱིས་བཀལ་བའི་དབང་ཆེན་གྱིས།།
ན་ལེན་མཁས་པའི་སློབ་གླིང་ཕྱིར་མིག་བྱོས།།

ཐོས་བསམ་བློ་ངོར་མ་ཡོང་དཀའ་བའི་ངོར།།
རྣམ་མངས་ལས་ཀྱིས་མ་ལྕོགས་འཁུན་སྒྲ་བཅས།།
དམན་པའི་གྲོང་དུ་བློ་མིག་གཏད་པའི་གྲོགས།།
ཁྱོད་དང་འཚམ་པའི་ལམ་ཞིག་ཅི་མ་རུང་།།

སྐབས་རེར་ཁྱོད་ཀྱིས་བྱིན་པའི་འཇིགས་པ་ཆེ།།
ལ་ལས་མི་ཚེ་འཛུམ་གྱིས་བསུས་པ་མང་།།
གང་ཡང་སྟོང་གསུམ་སྤུངས་པའི་རིན་ཆེན་ལས།།
ཁྱོད་ལ་བཅངས་པའི་རིན་ཐང་སུ་ཡིས་དཔོགས།།

ཞི་བདེའི་ཐར་པ་རེ་བའི་རློམ་སེམས་མེད།།
ཐམས་ཅད་མཁྱེན་པའི་གོ་འཕང་དེ་ལས་ཅི།།
ལྷག་བསམ་གཙང་མས་ཕྱུག་པའི་རྣམ་དཔྱོད་འདི།།
ཚེ་རབས་ཀུན་ཏུ་ལྡན་ན་ཅི་མ་རུང་།།

མཐོན་པོའི་ངོ་སོ་ཕྱུག་པོའི་རྒྱུ་ནོར་དང་།།
མཛེས་མའི་འཛུམ་གྱིས་བསླུ་བྲིད་མ་ཐེབས་ཅིང་།།
ལོག་རྟོག་རྙོགས་མའི་སེམས་ཀྱིས་མ་བསླད་པར།།
བདེན་པའི་གནས་ལུགས་སྨྱུག་གུའི་རྩེ་ནས་བཞུར།།
སྤྱི་ལོའི་༢༠༡༣ སྤྱི་ཟླ་ ༡ ཚེས་ ༡༣ ཉིན།