༸གོང་ས་རྒྱལ་བ་རིན་པོ་ཆེ་མཆོག་གིས་དུས་འཁོར་དབང་ཆེན་ཐེངས་སོ་གཉིས་པ་བཀའ་དྲིན་བསྐྱང་བའི་བཀྲ་ཤིས་པའི་དུས་ཚིགས་དང་བསྟུན་ནས་འབྲི་ཟླ་ཟལ་མོ་སྒང་གི་དྲ་ཚིགས་བལྟ་ཀློག་གནང་མཁན་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ།

ཤི་བོའི་སྐྱེ་སྒོ། སྟོན་པའི་གསེར་ཐང་།

 

༸གོང་ས་མཆོག་གིས་མཚན་རྟགས་དང་ཐུགས་སྨོན་མཚམས་སྦྱོར་ཅན་གྱི་གསེར་ཐང་།

ལྷ་བྲིས་པ། རླངས་རུ་ཀརྨ་རྡོ་རྗེ། སུད་སི།

 ཕྱི་ལོ་༢༠༡༠ ལོར་ཟླ་བཞི་པའི་ཚེས་༡༤ ཉིན། མདོ་ཁམས་སྐྱེ་རྒུ་མདོ་རུ་ས་འགུལ་གྱི་གོད་ཆག་གནོད་འཚེ་ཕོག་ནས་ཡུལ་མི་སྟོང་ཕྲག་དུ་མའི་ཚེ་སྲོག་ཤོར་ཞིང་མི་རྒྱུ་གཉིས་ལ་གསབ་ཏུ་མེད་པའི་རྐྱེན་ངན་བྱུང་བའི་སྐབས་སུ་འཛམ་གླིང་མི་མང་སྤྱི་དང་། ལྷག་པར་བོད་གངས་ཅན་པ་སྤྱི་ཡི་གོད་ཆག་ཅིག་ཏུ་བརྩིས་ནས་མདོ་དབུས་ཁམས་གསུམ་གྱི་རྩམ་གཟན་པ་ཡོངས་ཀྱིས་མ་བགྲོས་བསམ་པ་གཅིག་མཐུན་གྱིས་དཀའ་ངལ་ཐོད་དུ་བླངས་ནས་ཐལ་རྡུལ་གྱི་འོག་ཏུ་མནན་པའི་སྐྱེ་རྒུ་མདོ་པའི་མི་མང་རྣམས་མི་རྒྱུ་ཟོག་ནས་དངོས་ཤུགས་རྒྱུད་གསུམ་གྱིས་དཀའ་སྡུག་གི་གཡུལ་ངོ་ལས་བརྒྱལ་བའི་རེ་བ་ཞིག་གི་མགོ་བསླངས་ཡོད་པ་རེད། ད་དུང་ཡུལ་དེར་ལྟེ་ཁྲག་ཟོ་ནས་ས་མཐའ་རུ་འཚོ་བ་སྐྱེལ་བའི་ཡུལ་ཤུལ་པ་རྣམས་ནི་ཕ་མ་དང་། གཉེན་ཉེ། བརྩེ་གྲོགས་སོགས་གང་རུང་ཞིག་ས་བདག་ཁྲོས་པའི་ཆག་སྒོ་དེས་བཙན་གྱིས་མ་འཕྲོག་པ་སུ་ཡང་མེད་པའི་ཚོད་དུ་སླེབས། དེ་ནས་ཡུལ་ཤུལ་བའི་སྐྱེ་རྒུ་མདོ་རུ་སྐྱེས་པའི་ལྷ་བྲིས་པ་རླངས་རུ་ཀརྨ་རྡོ་རྗེ་ནས་ཀྱང་རང་གི་ལག་ཤེས་ཀྱི་སྒྱུ་རྩལ་ལ་བརྟེན་ནས་ཡུལ་ཤུལ་གྱི་ཤི་བོ་ལ་སྐྱེལ་མ་དང་། གསོན་པོ་རྣམས་ལ་སེམས་གསོའི་དོད་དུ་ སྤྱི་ནོར་༸གོང་ས་རྒྱལ་བ་རིན་པོ་ཆེ་ནས་ལྷག་པའི་ལྷ་འདི་དག་བཀའ་བཀོད་མཛད་པ་ལྟར་ལྷ་བྲིས་པ་འདི་ཉིད་ཀྱིས་ཟླ་བ་ཁ་ཤས་ཀྱི་རིང་དུ་དཀར་སྐྱོང་སྨྱུང་གནས་དང་། གཙང་སྦྲ་དང་ལྡན་ཞིང་དགེ་སེམས་ཁྱད་པར་ཅན་གྱི་སྒོ་ནས་སོར་མོའི་འདུ་བྱེད་ཀྱི་སྒྱུ་རྩལ་ལས་བསྐྲུན་པ་པའི་སྟོན་པ་གཙོ་ལྷ་མཛད་པའི་ཞལ་ཐང་འདི་ཉིད་ཆེད་དུ་རིན་མེད་ཀྱི་སྒོ་ནས་སྤུས་བྲིས་བྱས་འདུག

དམིགས་ཡུལ་གཅིག་དང་། ཐབས་ལམ་གཉིས། རག་ཤུལ་དཔལ་ལྡན།

          

  བདེ་སྐྱིད་ནི་སུས་ཀྱང་འདོད་པས་སྤྱི་ཚོགས་ཀྱི་བདེ་སྐྱིད་ནི་དམིགས་ཡུལ་གྱི་གཙོ་བོ་ཡིན་ལ།    འཆམ་མཐུན་དང་།                   འཕེལ་རྒྱས་ནི་དེའི་ཐབས་ལམ་ཡིན།  དེའི་ཕྱིར་ང་ཚོ་ལ་འཆམ་མཐུན་དང་འཕེལ་རྒྱས་ནི་མེད་ཐབས་མེད་པ་རེད།   

                   ནང་བསམ་བློའི་འཆམ་མཐུན།         

འཆམ་མཐུན་ཟེར་བ་དེ་ཕན་ཚུན་ཡིད་ཆེས་གཙང་མ་ཞིག་ལ་བརྟེན་ནས་ཡོང་གི་ཡོད་པས་ང་ཚོའི་བར་ཕན་ཚུན་ཡིད་ཆེས་གཙང་མ་ཞིག་མེད་ན་འཆམ་མཐུན་རྩ་བ་ནས་ཡོང་ཐབས་མེད།   དེ་ལ་ང་ཚོའི་བར་ཕན་ཚུན་ཡིད་ཆེས་གཙང་མ་ཞིག་ཇི་ལྟར་སླེབས་ཐུབ་བམ་ཞེས་པའི་དྲི་འདིི་ལ་ལན་གནལ་མ་ཞིག་དགོས་པ་ཡིན།   དེ་ནི་ང་ཚོ་ཚང་མས་དྲང་བདེན་བསམ་སྤྱོད་ཀྱི་བསླབ་བྱ་དེ་ཚོགས་འདུ་དང་མཛད་སྒོ་ག་གེ་མོ་ཞིག་གི་གཏམ་བཤད་ཀྱི་རྒྱུ་ཆ་ཙམ་མ་ཡིན་པར་ང་ཚོ་རང་རང་གི་ཉིན་རེའི་འཚོ་བའི་ནང་གི་རྒྱུ་ཆ་གཙོ་བོ་ཞིག་ལ་ངོས་འཛིན་བྱས་ནས་ལག་ལེན་དངོས་སུ་བསྟར་བའི་ཉིན་མོ་དེར་ང་ཚོ་ཕན་ཚུན་ཡིད་མི་ཆེས་པའི་རང་དབང་མེད་ལ།   ང་ཚོ་ཕན་ཚུན་ཡིད་ཆེས་གཙང་མ་ཡོང་བ་དེ་སུས་ཀྱང་བཀག་ཐུབ་ཀྱི་མ་རེད་ཞེས་པ་འདི་ཡིན། 

དྲང་བདེན་གྱི་སྐྱེས་བུ་དེ་ལ་སྐྱེ་བོ་གཞན་གྱིས་དྲང་བདེན་གྱི་བསམ་སྤྱོད་དེ་རྒྱུ་མཚན་དུ་བཟུང་ནས་ཡིད་ཆེས་བྱེད་ཀྱི་ཡོད།  

དྲང་བདེན་གྱི་བསླབ་པ་ཉམས་སུ་ལེན་ཞིང་དྲང་བདེན་གྱི་སློབ་གསོ་གནང་བའི་སྐྱེས་བུ་དམ་པ་དེ་ནི་ང་ཚོ་ཡར་རྒྱས་དང་བདེ་སྐྱིད་ཀྱི་ལམ་དུ་ཁྲིད་པའི་དད་དཔོན་འཁྲུལ་མེད་ཡིན་ལ།   དྲང་བདེན་གྱི་གཞུང་ལམ་དེ་ནི་འཇིག་རྟེན་འདིའི་སྟེང་དུ་ང་ཚོ་བདེ་ནས་བདེ་བར་འགྲོ་བའི་ལམ་པོ་ཆེ་གཅིག་རང་ཡོད་པ་དེ་ཡང་ཡིན།   དེའི་ཕྱིར་བདེན་པ་ནི་ང་ཚོས་ལུས་དང་ལོངས་སྤྱྱོད་དང་སྲོག་གི་ཕྱིར་ཡང་གཏོང་བར་མི་འོས་པའི་ཁྱད་ནོར་དམ་པ་དེ་ཡིན་པར་ཤེས་དགོས་པ་ཡིན།   དྲང་བདེན་གྱི་བསམ་བློ་དེ་ནི་མཐུན་པའི་རྒྱུ་ལས་མཐུན་པའི་འབྲས་བུ་འབྱུང་བའི་རྒྱུ་འབྲས་ཀྱི་གནས་ལུགས་ལ་ངེས་ཤེས་དང་ཡིད་ཆེས་བརྟན་པོ་ལས་འོང་གི་ཡོད།

       མཐུན་རྒྱུ་ལས་མཐུན་འབྲས་འབྱུང་བ་མྱོང་བས་གྲུབ་པ།

སྤྱིར་བཏང་ཕར་ལ་ཚིག་རྩུབ་བརྗོད་པ་ཡིན་ན་ཚུར་ལ་ཡང་ཐད་ཀར་ཚིག་རྩུབ་བརྗོད་རྒྱུ་དང་མ་དགའ་བའི་རྣམ་འགྱུར་ཡང་སྟོན་ངེས་རེད།

མ་ཟད་ཁོང་གཉིས་སེམས་ཐག་ཇེ་རིང་འགྲོ་རྒྱུ་རེད་ལ་ཡིད་ཆེས་ཡང་རྩ་བ་ནས་བྱེད་འདོད་ཡོང་གི་མ་རེད།   ཚིག་རྩུབ་ཡང་ཡང་སྨྲས་པ་ཡིན་ན་རྗེས་སུ་ཉིན་རེའི་འཚོ་བའི་ནང་ཚིག་རྩུབ་སྨྲ་རྒྱུ་ཇེ་མང་ཇེ་མང་འགྲོ་བ་དེ་མྱོང་ཐོག་ནས་ཤེས་ནུས།  དེ་ལྟར་ན་ཚིག་རྩུབ་ཀྱི་ལན་ལ་ཚིག་རྩུབ་དང་དེའི་འབྲས་བུ་ལ་ཡང་ཚིག་རྩུབ་དང་མ་སྐྱིད་པ་ཡོང་གི་ཡོད་པ་དེ་མྱོང་བས་གྲུབ་པ་རེད།   དེ་བཞིན་གཡོ་སྒྱུ་་དང་འཚེ་སེམས་སོགས་ལ་ཡངགཅིག་མཚུངས་ཡིན།

ཕར་ལ་དྲང་བདེན་བྱས་པ་ཡིན་ན་ཚུར་ལ་ཡང་དྲང་བདེན་བྱེད་ངེས་རེད་ལ་ད་དུང་དགའ་བའི་རྣམ་འགྱུར་ཡང་ཕྱི་རུ་མངོན་ཡོང་།   མ་ཟད་ཁོང་རྣམ་གཉིས་སེམས་ཐག་ཡང་ཇེ་ཉེ་འགྲོ་རྒྱུ་རེད་ལ་ཕན་ཚུན་ཡིད་མི་ཆེས་པའི་རང་དབང་ཡང་མེད་པ་ཆགས་རྒྱུ་རེད།   

ཉིན་རེའི་འཚོ་བའི་ནང་དྲང་བདེན་གྱི་ལས་ལ་གཞོལ་བ་ཡིན་ན་ནམ་ཞིག་དྲང་བདེན་བྱེད་པ་ལ་དཀའ་ཚེགས་གང་ཡང་མེད་ཐོག་དེ་ལ་དགའ་མོས་ཡང་ངང་གིས་ཡོང་རྒྱུར་ཐེ་ཚོམ་ཅི་ཡང་མེད།   འདི་ནི་དྲང་བདེན་གྱི་ལན་ལ་དྲང་བདེན་དང་དེའི་འབྲས་བུ་ལ་ཡང་དྲང་བདེན་དང་བདེ་སྐྱིད་ཡོང་བ་དེ་ཡང་མྱོང་ཚོར་གྱིས་གྲུབ་པ་ཡིན།    འགྲོས་དེ་ནི་བརྩེ་སེམས་དང་ཕན་སེམས་སོགས་ལ་ཡང་ཡོད།   དེའི་ལན་ལ་དེ་རང་སྤྲད་འོང་བ་འདི་ནི་བདེ་སྡུག་ལ་འདོར་ལེན་བྱེད་པའི་སྐྱེ་བོ་རྣམས་ཀྱི་རང་གཤིས་རེད་ལ།   

དེའི་འབྲས་བུ་ལ་དེ་རང་འབྱུང་བ་དང་གང་ལ་གོམས་པ་དེའི་ཕྱོགས་སུ་ངེས་པར་དུ་གཡོ་འགྲོ་བ་འདི་ནི་བསམ་བློའི་ཆོས་ཉིད་ཀྱང་རེད།།    

བསམ་ངན་སྦྱོར་རྩུབ་གྱི་ལན་ལ་བསམ་ངན་སྦྱོར་རང་སླེབས་འོང་བ་དང་དེའི་འབྲས་བུ་ལ་ཡང་དེ་རང་འབྱུང་བའི་གནས་ལུགས་འདི་ལ་བརྟེན་ནས་ང་ཚོ་དུས་ནམ་ཡང་འཆམ་མཐུན་འོང་ཐབས་མེད་ལ་ང་ཚོའིིིསྤྱི་ཚོགས་ནང་བདེ་སྐྱིད་ཀྱི་གཞི་རྩ་ཡང་ཚུགས་ཐབས་མེད།   དེའི་ལན་དང་འབྲས་བུ་ལ་དེ་རང་འབྱུང་བའི་དྲང་བདེན་སྤྱོད་བཟང་གི་ལམ་དུ་བསྙེག་པ་ཡིན་ན་གཏིང་ཟབ་ཀྱི་འཆམ་མཐུན་ལྡན་པའི་སྤྱི་ཚོགས་ཞིག་ཆགས་རྒྱུ་རེད་ལ་ངོམས་པ་མེད་པའི་བདེ་སྐྱིད་ཀྱི་དཔལ་ཡོན་ཡང་ཉིན་རེ་ནས་ཉིན་རེ་བཞིན་ཇེ་མང་ནས་ཇེ་མང་དུ་བཞད་འོང་བར་ངེས།  དེའི་ཕྱིར་ང་ཚོ་ཚང་མས་ཉིན་རེའི་འཚོ་བའི་ནང་ཁ་ཞེ་གཉིས་མེད་ཀྱིས་འཇུག་ལྡོག་འདོད་པའི་ཚོར་བ་བདེ་སྡུག་གཉིས་ཀྱི་རྒྱུ་བསམ་པ་བཟང་ངན་གཉིས་ལ་འདོར་ལེན་བྱེད་ཐབས་གསལ་བར་སྟོན་པའི་ནང་དོན་ཀུན་སྤྱོད་རིག་པའི་སློབ་ཚན་དེ་དག་ང་ཚོས་མ་ཤེས་ན་ཐབས་མེད་རེད་ལ།   ཤེས་དགོས་པ་དེ་ནི་གལ་ཆེན་ནང་གི་དོོན་ཆེན་ཡང་རེད།   དེ་ནི་ནང་བསམ་བློའི་སྟེང་དུ་མཐུན་པའི་རྒྱུ་ལས་མཐུན་པའི་འབྲས་བུ་འབྱུང་བ་དེ་མྱོང་བས་གྲུབ་པའི་བསྐོར་གྱི་བསམ་ཚུལ་ཅུང་ཟད་བརྗོད་པ་ཡིན། 

            འཕྲོས་དོན་དང་པོ།        རིགས་ཞེན་གྱི་ཚོར་བའི་བཟི་ཁ། 

རྔ་ཡུལ་སྣང་ཞིག་དགོན་པས་ཡུལ་ཤུལ་རོགས་སྐྱོར།

རྔ་ལྗོངས་བོན་གྱི་འདུས་སྡེ་ཆེན་པོ་སྣང་ཞིག་དགོན་ཆེན་གྱིས་ཡུལ་ཤུལ་གནོད་ཐེབས་ས་ཁུལ་ལ་ཕྱེ་འབྲས་ནས་རྩམ་པ་མར་སོགས་རྒྱ་མ་ཁྲི་ཕྲག་མང་པོ་དང༌།འཇོག་ཐུགས་སོགས་ཀྱི་རིགས་དམངས་སྒོར་ཁྲི་ཕྲག་དགུ་ཙམ་གྱི་རོགས་རམ། དམངས་སྒོར་རྐྱང་བ་ཁྲི་ཕྲག་བཅུ་གཅིག་ལྷག་གིས་རོགས་རམ་བྱས་ཡོད་འདུག
 
  

བྱམས་བརྩེ་ཚོགས་པས་ཡུལ་ཤུལ་རོགས་སྐྱོར།

—— ཡང་ན་བྱམས་དང་སྙིང་རྗེའི་བསླངས་པའི་ཁ་བའི་ཁྲོད་དུ་རྡོ་སོལ་བསྐྱལ་བ་ཞེས་པའི་ལས་འགུལ་ཞིག
     ཡུལ་ཤུལ་དུ་ས་འགུལ་བྱུང་བ་ནས་བཟུང་། འཛམ་གླིང་སྐྱེ་འགྲོ་ཡོངས་ཀྱིས་མིག་གིས་ཡུལ་ཤུལ་མི་དམངས་ཀྱི་བདེ་སྡུག་ལ་དོ་ཁུར་བླ་ལྷག་བྱེད་ཀྱིན་ཡོད་ཅིང་། སྲིད་གཞུང་གི་རོགས་སྐྱོར་གྱིས་ཟུར་བརྒྱན་པའི་བྱམས་བརྩེ་ལྡན་པའི་མི་རིགས་སོ་སོ་དང་ཚོགས་པ་སོ་སོས་ཀྱང་རང་གི་ནུས་ཚོད་ཀྱི་ལྷག་བསམ་རྣམ་དག་གིས་རོགས་རམ་བྱེད་ཀྱིན་ཡོད་པ་རེད། བྱམས་བརྩེ་ཚོགས་པ་ཡང་ལྷག་བསམ་རྣམ་དག་གིས་རྨང་གདིང་བའི་ཚོགས་པ་དེའི་གྲས་གཅིག་ཡིན་ཅིང་། ད་ཐེངས་ནི་བྱམས་བརྩེ་ཚོགས་པ་ཡུལ་ཤུལ་ནས་ཉམས་རྒུད་ཐེབས་པའི་མི་སེར་ལ་རོགས་སྐྱོར་བྱེད་དུ་ཡོང་ཐེངས་བཞི་བ་ཡིན།
                      
                                              ཡུལ་དངོས་ཀྱི་ཟུར་ཞིག
     སྤྱིར་བྱམས་དང་བརྩེ་བ་ནི་སངས་རྒྱས་ཆོས་ལུགས་པ་ཞིག་གི་ངོས་ནས་བཤད་ན་ཆེས་མེད་དུ་མི་རུང་བའི་གྲུབ་ཆ་གལ་ཆེན་ཞིག་ཡིན་ལ། བྱམས་དང་བརྩེ་བ་ཡོད་པས་ད་གཟོད་བོད་བརྒྱུད་ནང་བསྟན་གྱི་ཞི་བདེའི་ལྟ་དགོངས་ཆེན་པོ་ལ་འཛམ་གླིང་གི་ཡུལ་གྲུ་སོ་སོ་ནས་གདེངས་འཇོག་མི་དམན་པ་ཐོབ་ཀྱིན་ཡོད་པ་རེད། ང་རང་ཤཱཀྱའི་རྗེས་འཇུག་པ་ཞིག་ཡིན་པའི་ངོས་ནས་བོད་བརྒྱུད་ནང་བསྟན་གྱི་བྱམས་བརྩེའི་སྙིང་སྟོབས་འཛིན་སྐྱོང་སྤེལ་གསུམ་གྱི་འོས་འགན་ལྕི་མོ་ཡོད་ལ། དེ་བཞིན་དུ། རང་ངོས་ནས་ཀྱང་ཡུལ་ཤུལ་གྱི་ས་ཡོམ་ཁྲོད་དུ་གནོད་སྐྱོན་ཐེབས་པའི་མི་སེར་དག་ལ་ནུས་པ་ཕྲ་མོ་ཞིག་འདོན་འདོད་ཀྱི་ཀུན་སློང་གཙང་མ་མེ་ལྕེ་བཞིན་འབར་གྱིན་ཡོད།
               
                                ཐེངས་འདིའི་ང་ཚོའི་ལས་བཟོ་བ་དག་གི་མཉམ་པར།
     སྤྱིར་སངས་རྒྱས་བསྟན་པའི་དགེ་མཚན་དང་། སྒོས་སུ་ང་རང་གི་སློབ་བུ་ནང་ཆོས་ལ་དད་པ་བྱེད་མཁན་སྐོར་ཞིག་གི་རོགས་སྐྱོར་ལ་བསྟེན་ནས་ཐེངས་དང་པོར་སྒོར་ཁྲི་སྟོང་གཅིག་དང་གུར་སྟོང་གཅིག་གིས་རོགས་རམ་བྱས་ཡོད། ཐེངས་འདིའི་དམངས་ཁྲོད་ཀྱི་རོགས་སྐྱོར་མ་དངུལ་བསྡུ་མཁན་དང་གནང་མཁན་གཙོ་བོ་ནི། 《新周刊》杂志社社长孙冕      凤凰卫视执行台长刘春 ང་རང་གིས་བཙུགས་པའི་བྱམས་བརྩེ་ཚོགས་པ་གསུམ་ཡིན་ལ། སྒོར་2567524.49ཡིས་ཡུལ་ཤུལ་གྱི་དུད་ཁྱིམ་ཁྲི་གཉིས་ལྷག་ལ་རྡོ་སོལ་2280吨ཉོས་ཤིང་། (ཁྱིམ་ཚང་གཅིག་ལ་རྡོ་སོལ་ཁུག་མ་གསུམ་ནས་ལྔ་ཡི་བར་)དངུལ་སྒོར་རྐྱང་བ74000ཡི་རོགས་སྐྱོར་བྱས་ཡོད། ད་ཐེངས་སྒོར་གྱི་ཁ་གྲངས་ངོས་ནས་མི་སེར་དག་གི་ཡུན་རིང་གི་དཀའ་སྡུག་སེལ་མི་ཐུབ་ན་ཡང་། ཐེངས་འདིར་ནང་ལོག་ན་མིང་དུ་གྲགས་ཡོད་པའི་སྨྱན་བྱེད་གསར་འགྱུར་འདི་གཉིས་ཀྱི་གཙོས་ང་རང་གི་ཞིན་ལང་པོད་འཕྲིན་སོགས་བརྒྱུད་ནས་འཛམ་གླིང་གི་མི་ས་ཡ་མང་པོའི་སྤྱན་ལམ་དུ་བསྟར་ཡོད། ཐེངས་འདིའི་ཁྱབ་བསྒྲགས་ཀྱི་མཐུ་ལས་ད་དུང་ཡང་བྱམས་བརྩེ་ཅན་མང་པོས་རོགས་རམ་བྱ་རྩིས་ཡོད་ལ། ངེད་ཅག་གི་རྩ་འཛུགས་འདི་ཡང་མུ་མཐུད་ནས་ཁྱེད་ཅག་དང་ལྷན་དུ་དཀའ་སྡུག་གི་ཁུར་བོ་མཉམ་དུ་སེལ་རྒྱུའི་གདོང་གྲོགས་སུ་ཡོང་རྒྱུའི་འཆར་གཞི་ཟབ་མོ་ཡོད།
   


                             
                                             རྡོ་སོལ་བསྐྱལ་བཞིན་པའི་རྣམ་པ།
     མཐར་ང་རང་ཤཱཀྱའི་དགེ་སློང་གི་ཞིག་གི་ངོས་ནས་ཡུལ་ཤུལ་གྱི་མི་སེར་རྣམས་ལ་ཞུ་འདོད་པ་ནི། ཆག་འཇིག་ནི་འགྲོ་བ་མིའི་རིགས་ཀྱི་སྟེང་ལ་ནམ་ཡོང་ཆ་མེད་ཀྱི་ཆོས་ཉིད་ཅིག་ཡིན་ལ། དེ་བཞིན་དུ། དཀའ་སྡུག་མཐའ་དག་བདེ་ལེགས་ངང་སེལ་ཐུབ་པ་ཡང་འགྲོ་བ་མིའི་རིགས་ཀྱི་ཆོས་ཉིད་ཀྱིས་གཏན་འཁེལ་བྱས་ཡོད་པ་རེད། དེ་ལྟ་ན་འུ་ཅག་གི་རྩྭ་ཐང་ལ་བདེ་སྐྱིད་ཀྱི་ཉི་འོད་འཕྲོ་ཞིང་། སློབ་གསོ་དང་རིག་གནས་ཀྱི་ཆར་ཆུ་དུས་ལྟར་འབབ་པའི་ཡིད་ཆེས་ཡོད་ལ་སྨོན་པ་ཡང་ཤུགས་ཆེན་པོ་འདེབས་ཀྱིན་ཡོད། ཞལ་དྲོ།
                                                                              ཞེས་དགེ་མིང་འཛིན་པ་ཚུལ་ཁྲིམས་རྒྱ་མཚོས།
                                                                                     

ཀུན་གླེང་ནང་གི་སྐྱེ་རྒུ་མདོ།

སྐྱེ་རྒུ་མདོ་བསྐྱར་འཛུགས།

ཡུལ་ཤུལ་གནོད་ཐེབས་ལ་ཕུལ་བའི་རོགས་སྐྱོར་གྱི་སྒོར་མོ་གང་དུ་འདུག ཆུ་ཐིག་སྔོན་མོ།

ཡུལ་ཤུལ་གནོད་ཐེབས་ལ་ཕུལ་བའི་རོགས་སྐྱོར་གྱི་སྒོར་མོ་གང་དུ་འདུག

འདས་སོང་ལ་ཕྱིར་དྲན་བྱས་ན་དགོས་པ་མེད་ཅེས་སྨྲ་སྲིད་ཀྱང་འདི་ནི་རང་འགར་འཇོག་མི་ནུས་པའི་གནད་དོན་ཞིག་ཏུ་བཟུང་ནས་འདིར་ཅུང་ཙམ་འགོད་རྒྱུ་ཡིན།
   

           ལོ་ཤས་གོང་གཞིས་བཞུགས་བོད་མིས་རང་སྲོག་བློས་བཏང་སྟེ་རྒྱ་གཞུང་ལ་ངོ་རྒོལ་ཤུགས་ཆེན་བྱས་མཐར་བོད་མི་བརྒྱ་ཕྲག་དུ་མ་རྐྱེན་ལམ་དུ་བཏང་བས་འཛམ་གླིང་གང་ས་ནས་ཕྱི་སྡོད་བོད་མི་ཚོས་རང་ནུས་གང་ཡོད་ཀྱིས་རྒྱ་གཞུང་ལ་ངོ་རྒོལ་དང་འདས་པོ་ཚོར་གདུང་སེམས་མཉམ་བསྐྱེད་བྱས་པ་རེད། དེ་དུས་བོད་མི་ཚོའི་སེམས་ཤུགས་མེ་ལྟར་འབར་བའི་སྐབས་ཡིན། སྐབས་དེར་གློ་བུར་དུ་ཡུལ་ཤུལ་ཕྱོགས་སུ་བསམ་ཡུལ་ལས་འདས་པའི་ས་ཡོམ་གྱི་འཇིག་པ་ཞིག་བྱུང་བ་དེས་བོད་མི་ཚོར་མིག་སྐྲང་ཐོག་ཏུ་ཁུ་ཚུར་ཞེས་པའི་དཔེ་ལྟར་གྱུར་པ་རེད། སྐབས་དེར་འཛམ་གླིང་གང་ས་ནས་རྒྱལ་ཁབ་སོ་སོ་དང་མི་སྒེར་སོ་སོས་རོགས་རམ་འདྲ་མིན་བྱས་པ་མ་ཟད་ཕྱི་སྡོད་བོད་མི་ཚོས་ཀྱང་རང་ངོས་ནས་འབྱོར་ཚོད་ཀྱིས་ཞལ་འདེབས་བསྡུ་རུབ་ས་གནས་གང་ས་ནས་བྱས་ཡོད། དེ་ནི་སྐབས་དེའི་ཡུལ་ཤུལ་བའི་ཤུལ་ལུས་ཚོ་སེམས་ཀྱིས་མ་བཟོད་པས་རེད། དེ་མིན་སྐབས་དེར་འདིར་བཞུགས་ཡུལ་ཤུལ་བ་ཚོས་ཀྱང་སྐྱོ་གདུང་དང་ལྷན་དུ་ཞལ་འདེབས་རེ་གནང་རོགས་ཞེས་སྐད་ངག་གཉོམ་པོས་སྤུན་ཟླ་ཚོར་ཞུ་འབོད་འཐེན་གྱི་འདུག་པ་ད་དུང་ང་ཚོའི་དྲན་ངོགས་ནས་ཡལ་དུ་མེད་པ་ཞིག་ཡིན། ང་ཚོས་ངོས་ནས་ཀྱང་ཡོད་ཚོད་ཀྱིས་ཞལ་འདེབས་སུ་ཉུང་ཤོས་སྒོར་ལྔ་བཅུ་དང་བརྒྱ་ཡར་མར་དང་མང་མཐའ་ཁྲི་འབུམ་བྱས་ནས་ཡུལ་ཤུལ་སྤུན་ཟླ་ཚོར་རོགས་སྐྱོར་བྱེད་ཁུལ་བྱས་པ་རེད། ཁོང་ཚོས་བཤད་རྒྱུར་རིང་མིན་ཁོང་ཚོའི་ཕ་ཡུལ་གྱི་དཀའ་ངལ་ལ་རོགས་རམ་འདི་འབྱོར་ཐབས་བྱེད་ངེས་ཡིན་ཞེས་ས་བསྒྲགས་གནམ་བསྒྲགས་བྱེད་ཀྱིན་འདུག་པ་མ་ཟད་དུས་ཚོད་འདི་འདྲ་ཞིག་གི་ནང་དུ་འགྲོ་ཐུབ་ས་རེད་ཅེས་བཤད་ཀྱི་འདུག ཡིན་ནའང་ཉིན་ཞག་ཟླ་བས་བསྐྱལ་ནས་དུས་ཡུན་གང་འཚམ་སོང་རྗེས་གནོད་ཐེབས་ཡུལ་ཤུལ་སྤུན་ཟླ་ཚོའི་ལག་ཏུ་ཇི་ལྟར་འབྱོར་མིན་གྲག་འགུལ་ཅི་ཡང་མེད་པར་ཇེ་འཇམ་ནས་ཇེ་འཇམ་དུ་གྱུར། ང་ཚོས་འདི་ནས་ཕུལ་བའི་སྒོར་མོ་དེ་གནོད་ཐེབས་སྤུན་ཟླ་ཚོའི་ལག་ཏུ་འབྱོར་ནས་ཁོང་ཚོར་ཕན་ཐོགས་ཤིག་ཡོང་རྒྱུའི་རེ་བ་བཟུང་ནས་བསྡད་པ་རེད། ང་ཚོར་འབྱོར་ལན་ཞིག་ཡོང་རྒྱུར་བསྒུགས་ནས་ལོ་ཤས་ཕྱིན་སོང་ཡང་ཁོང་ཚོ་ད་དུང་སླེབས་མི་འདུག སྐབས་དེའི་སློང་མོ་གནང་མཁན་གྱི་འདིར་བཞུགས་ཡུལ་ཤུལ་བ་ཚོའང་འཇམ་ལྷིང་ངེར། དོན་དངོས་ཡུལ་ཤུལ་གྱི་གནོད་ཐེབས་ས་ཁུལ་གྱི་བོད་མི་ཚོར་ཕན་ཐོགས་བྱུང་ཡོད་དམ་མེད། ངས་བཤད་འདོད་པ་དེ་འདི་ཡིན།
ཞལ་འདེབས་འདི་་་་་་སུས་བསྡུས་པ་རེད་་་སུའི་ལག་ཏུ་ཡོད་པ་རེད་་་་སུ་ལ་སྤྲད་པ་རེད་་་་་སུ་ལ་ཕན་ཐོགས་པ་རེད་་་་་ཅི་ཙམ་སྤྲད་པ་རེད་་་་གསལ་ཆ་ཅི་ཡང་མེད་པར་སྒོར་མོ་འབུམ་ཕྲག་མང་པོ་ཞིག་སུ་ལ་ཞལ་འདེབས་བྱས་པ་རེད། སྐབས་དེར་ཞལ་འདེབས་བསྡུ་བཞིན་ཡོད་ཅེས་དྲ་ཐོག་དང་ངག་ཐོག་ནས་སྐད་འབོད་བྱས་ནས་སྒོར་གཅིག་ལས་མ་རེག་ཀྱང་ཤུགས་བརྒྱབས་ནས་རྒྱུགས་པ་རེད། བསྡུས་ཚར་རྗེས་གོ་ཐོས་ཅི་ཡང་མེད་པར་འཇམ་ཐང་ངེར་ཅིའི་ཕྱིར་སོང་བ་རེད། གསལ་བྱེད་ཅི་ཡང་མེད་པ་རེད་དམ། ཡུལ་ཤུལ་མི་མང་ཉམ་ཐག་ཚོའི་ལག་ཏུ་འབྱོར་ཡོད་པ་ཨེ་རེད། ཡོད་ན་དེས་ཆོག་པ་རེད། འདིའི་སྐོར་བཤད་ཀྱི་ཤེས་ཀྱི་མི་འདུག དྲ་གྲོགས་ཚོར་དགོངས་ཚུལ་དང་ཁ་གསལ་གྱི་ལན་རེ་ཡོད་ན་འདིར་འགོད་རོགས།

དྲ་གྲོགས་ཚོར་དགོངས་དག་ཞུ་བ་ཞིག་ལ་ངས་བསམ་ཚུལ་འདི་ཐད་ཀར་དྲ་ཐོག་ནས་བྲིས་པ་ཡིན་པས་ཆད་ལྷག་དང་ནོར་འཁྲུལ་ཡོད་ན་དགོངས་དག་ཞུས་པ་ཡིན།

ཡུལ་ཤུལ། ཆེས་གཅེས་པར་འོས་པའི་ཕ་ཡུལ། གཟུངས་ཕྱུག་སྐྱིད།

 

གནམ་རྒན་མ་དགོད་ཀྱིན་འདུག སོ་ཕྲེང་མི་མངོན་པའི་སྐྱི་པགས་ཀྱི་བར་ན་དགོད་ཀྱིན་འདུག ན་ཟུག་མེད་པའི་འཁུན་སྒྲ་ཡི་ཀློང་ན་དགོད་ཀྱིན་འདུག འདི་ནི་མིག་ཟུང་ཁྲག་གིས་སྐམ་ཟིན་པའི་ཞོགས་པ་ཞིག་ཡིན་ནམ། ཡང་ན་དབྱངས་རྟ་ཐག་པས་བཀག་ཟིན་པའི་ས་སྲོད་ཅིག་ཡིན།

ཆེས་རང་བྱུང་དང་འཇིགས་སྣང་ཞིག་གི་གཡོ་འགུལ་ཁྲོད། མཛེས་སྡུག་གི་ཚེ་སྲོག་རེ་རེ་ནི་ཇི་འདྲའི་སྙིང་ཉེ་བའི་ཤ་རུས་ཀྱི་ན་ཟུག་ཞིག་རེད་ཨང་། ཆེས་དྭངས་གཙང་དང་དྲོད་སྣང་གིས་འཁྱིལ་བའི་ཁྱིམ་གཞི་དེ་ནས། གློ་བུར་དུ་མུན་ནག་གི་མྱ་ངན་ཞིག་གནམ་སའི་བར་དུ་མཆེད་ཅིང་། ཆག་འཇིག་གི་ལོ་རྒྱུས་ཤིག་རི་ཆུའི་གཏིང་བར་འཐིམ་སོང་།

འདི་ལྟར སང་ཉིན་གྱི་རྨི་ལམ་ན་སྦྲུམ་པའི་ཁྱིམ་གཞི་ཞིག་རང་བྱུང་གིས་རྨག་མེད་དུ་བཅོམ་ཡང་།འདི་ལྟར་ཟོལ་མེད་དྭངས་གཙང་གིས་འཁྱིལ་བའི་འཛུམ་མདངས་ཤིག་འོ་དོད་ཀྱིས་ཧྲུག་ཧྲུག་འཆས་ཀྱང་། མི་ཡུལ་འདིར་ཁྱེད་རང་དུས་གཏན་དུ་ཁེར་རྐྱང་ཡིན་མི་སྲིད།
རྩིས་སུ་མེད་པའི་མིག་ཟུང་དུ་མ་ཞིག་གི་དུང་སྣང་གིས་ཁྱེད་རང་འཚོལ་གྱིན་ཡོད་ལ།
འཇགས་སུ་མེད་པའི་སེམས་མ་གྲངས་མེད་ཅིག་གི་ན་ཟུག་གིས་ཁྱེད་ཚོ་མཐོ་རུ་བསྒྲེངས་ཡོད། བདག་གི་བཞུད་སོང་བའི་གཉེན་ཉེ་ལགས།

རྨི་ལམ་ལྟ་བུའི་གས་ཆག་དམར་པོ་དེའི་སྲུབས་ཀ་རེ་རེ་ན། མིག་ཆུ་བཞུར་མ་ཚར་བའི་སེམས་པ་ག་ཚོད་སྦས་ཡོད། འཇིགས་རུང་ལྟ་བུའི་འུར་ཟིང་ནག་པོ་དེའི་སྟེང་རིམ་ན།
མིག་ཟུང་དྲུས་ཚར་བའི་བརྩེ་འདང་ཅི་ཙམ་ལུས་ཡོད་ཨང་།

བདག་གི་སྤུན་ཟླ བདག་གི་གཉེན་ཉེ བདག་གི་ཕ་ཡུལ་ཨ།

ཆེས་རྒྱང་ཐག་རིང་བའི་མི་ཡུལ་གྱི་ཡུལ་མཐའ་ཞིག་ནས། མར་མེ་རྐང་གཅིག་གི་སེམས་འདུན་མཐོ་རུ་བསྒྲེངས་བཞིན། བདག་གིས་འདི་ལྟར་འཇིག་རྟེན་ལ་འཁང་ར་བྱེད་ཀྱིན་ཡོད།
ཆེས་སྐྱོ་གདུང་དང་མྱ་ངན་ལྕི་བའི་ས་སྲོད་ཅིག་ལ། མ་ཎི་ཚར་གཅིག་གི་དབུགས་དབྱུང་ཁྲོད་ནས། བདག་གིས་འདི་ལྟར་རང་ཉིད་ལ་ངེས་ཤེས་བཙལ་གྱིན་ཡོད།
ཡུལ་ཤུལ། ཆེས་གཅེས་པར་འོས་པའི་བདག་གི་ཕ་ཡུལ་ལགས
༢༠༡༠ལོའི་ཟླ་༤ཚེས་༡༤ཉིན་ཡུལ་ཤུལ་སྐྱེ་རྒུ་གྲོང་རྡལ་དུ་བྱུང་བའི་ས་འགུལ་ཐོས་རྗེས་སུ་བྲིས།

༸གོང་ས་མཆོག་དང་། ཆོས་ཀྱི་སྙིང་པོ་ཅན་གྱི་ཆབ་སྲིད།

༡༽

ཆོས་ལྡན་གངས་རིས་བསྐོར་བའི་གདོང་དམར་བ།། ཆོས་འབྱོར་དཔལ་གྱི་རོ་ལ་སྤྱོད་འདོད་ན།། ཆོས་ཀྱི་སྙིང་པོ་ཅན་གྱི་རྒྱལ་ཐབས་ཆེ།། ཆོས་ཀྱི་རྒྱལ་པོའི་བཀའ་བཞིན་ཉམས་སུ་ལོངས།།

དེ་ཡང་སྤྱིར་ན་ཆབ་སྲིད་ཅེས་པའི་མིང་ཚིག་འདི་ཉིད་ཆེས་སྔ་མོ་ཞིག་བོད་གངས་ཅན་གྱི་ལྗོངས་སུ་བེད་སྤྱོད་བྱེད་གཞིན་པའི་གདོད་མའི་མིང་ཚིག་རྙིང་པ་ཞིག་གི་ངོ་བོ་ཡོད་པ་རེད། མིང་ཚིག་འདི་ཉིད་ཀྱིས་ཅི་ཞིག་བསྟན་པ་རེད་ཅེ་ན། མིང་ཚིག་འདི་ནི་རྒྱལ་པོ་རྣམས་ཀྱི་མངའ་ཐང་ཇི་ལྟར་བསྐྱོང་ཚུལ་དཔེའི་སྒོ་ནས་བསྟན་པའི་ཐ་སྙད་ཅིག་སྟེ། དཔེའི་སྒོ་ནས་བསྟན་སྟངས་ནི། ཆབ་ཅེས་པ་ནི་ཆུ་དང་། སྲིད་ཅེས་པ་ནི་རིང་ཚད་ཀྱི་གོ་དོན་ཡོད་པ་བཞིན་རྒྱལ་པོ་རྣམས་ཀྱི་རང་གི་མངའ་འབངས་ཀྱི་བདེ་སྐྱིད་དང་། མཐའ་བཞི་རྒྱ་བསྐྱེད། འབངས་མི་སེར་བྱམས་སྐྱོང་བྱེད་སྟངས་སོགས་ཡུན་ནས་ཡུན་དུ་དང་། རྒྱང་ནས་རྒྱང་དུ་རྒྱ་སྐྱེད་བྱེད་པའི་ཐབས་ཚུལ་ཞིག་ལ་ཆབ་སྲིད་ཅེས་མིང་གིས་བསྙད་པ་ཡིན་ནོ། དེའི་འདྲ་བའི་ཆབ་སྲིད་དེ་འཛམ་གླིང་ཤར་ནུབ་གཉིས་སུ་གོ་བ་ལེན་སྟངས་མི་འདྲ་བ་གཉིས་ཡོད་པ་རེད་བསམ། ཤར་ཕྱོགས་པ་སྤྱི་དང་། ལྷག་པར་དུ་བོད་གངས་ཅན་པས་ཆབ་སྲིད་ལ་གོ་ལེན་སྟངས་གཅིག་དང་། དེ་བཞིན་དུ་ནུབ་ཕྱོགས་པ་རྣམས་ཀྱིས་གོ་བ་ལེན་སྟངས་གཅིག་སྟེ་མིང་ཚིག་གཅིག་ལ་ཁོར་ཡུག་དང་སྲོལ་རྒྱུན་གྱི་འདུ་ཤེས་འཛིན་སྟངས་དབང་གིས་གོ་བ་ལེན་སྟངས་མི་འདྲ་བ་གཉིས་ཡོད་པ་རེད། དེ་ཡང་ནུབ་ཕྱོགས་པས་གོ་བ་ཇི་ལྟར་ལེན་པ་ནི། རང་ཉིད་རྣམ་པ་ཀུན་དུ་རྒྱལ་ཐབས་དང་། ཕ་རོལ་པོ་དེ་ཉིད་གཏན་དུ་འཇོམས་ཐབས། རབ་ན་རྩ་མེད་དུ་བཟོ་ཐབས། གལ་སྲིད་དེ་ལྟར་མ་ཡོང་ནའང་རང་གི་གོང་དུ་རྩ་བ་ནས་སླེབས་མི་ཐུབ་པ་བཟོ་རྒྱུ་དེ་རེད། དཔེར་ན་ང་ཚོའི་མིག་སྔར་གནས་ཚུལ་མཐོང་བཞིན་པའི་འཛམ་གླིང་སྟོབས་ཆེན་རྒྱལ་ཁབ་ཨ་མེ་རི་ཁ་ལྟ་བུ་ཡིན་ན། འཇིག་རྟེན་འདི་ཨ་མེ་རི་ཁས་སྣེ་ཁྲིད་དགོས་པ་དང་། ཨ་མེ་རི་ཁའི་བཀོད་འདོམས་འོག་ཏུ་འགྲོ་དགོས་པ། གཞན་རྒྱལ་ཁབ་མཐའ་དག་རང་ཉིད་ཀྱི་རྗེས་སུ་ཡོང་དགོས་པ་དང་། རང་གི་བཀོད་འདོམས་ལ་ཉན་འཇོག་བྱེད་དགོས་པ་རེད། གལ་སྲིད་དེ་ལྟར་མིན་པར་རང་གི་སྔོན་ནས་སྐད་ཆ་བཤད་པ་སོགས་རང་དང་མཉམ་པར་རྒྱལ་སྤྱི་ལྡིང་ཆའི་ཐོག་ཏུ་བྱུང་བ་ཡིན་ན་རང་ཉིད་ཀྱི་ཕྲག་པར་སླེབས་དོགས་ཀྱིས་ཡང་ན་མགོ་བོར་ཐོ་བ་ཞིག་བཞུས་ཡོང་བ་དང་། ཡང་ན་རྐང་པ་ལ་ཐག་པ་ཞིག་བཏགས་ནས་གྱེན་དུ་གཏན་ནས་འགྲོ་རྒྱུ་མེད་པར་བཟོ་རྒྱུ་རེད།
བྱེད་ཐབས་འདི་དང་ཀུན་སློང་འདི་འདྲ་བའི་རིགས་ཅན་ལ་རང་ཁེ་གཞན་ཕམ་གཙོ་བོ་ལྷུར་བླངས་པ་ཡིན་པས་ཆབ་སྲིད་ནག་པོ་ཞེས་བཏགས་ན་འགྲིག་རྒྱུ་རེད་བསམ། ད་འོ་ན་ནག་པོ་དེས་ཟླས་དྲངས་པའི་ཆབ་སྲིད་དཀར་པོ་ཞིག་ཇི་འདྲ་བ་ཞིག་ཡོད་དམ་ཞེ་ན། དེ་བོད་ཀྱི་ཆོས་རྒྱལ་མེས་དབོན་རྣམ་གསུམ་ནས་བཟུང་སྟེ་བོད་ཀྱི་རྒྱལ་རབས་རིམ་བྱོན་དང་། ལྷག་པར་བོད་བླ་མའི་རྒྱལ་རབས་ཀྱི་ནང་ཚུན་གཞུང་ས་དགའ་ལྡན་ཕོ་བྲང་པའི་ཆབ་སྲིད་བསྐྱངས་སྟངས་དེ་ཆོས་སྲིད་ཟུང་འབྲེལ་གྱི་ཆབ་སྲིད་བསྐྱངས་སྟངས་དེ་ཡིན་པ་རེད། ཆོས་སྲིད་ཟུང་འབྲེལ་བྱེད་སྟངས་ཡང་ཡུལ་གྱི་རྒྱལ་པོ་གཅིག་གིས་ཆོས་དང་ཆབ་སྲིད་གཉིས་ཀའི་མགོ་ཁྲིད་བྱེད་སྟངས་དེ་མ་ཡིན་པར་ཆབ་སྲིད་རང་གི་ངོ་བོ་ཆོས་དང་མི་འགལ་བར་བསྐྱངས་པ་དེ་ལ་གོ་དགོས་པ་ཡིན། སྤྱིར་ན་ཆོས་དང་ཆབ་སྲིད་གཉིས་མཉམ་དུ་སྦྲེལ་རྒྱུ་ཡོད་མེད་ཀྱི་འདོད་ཚུལ་གཉིས་སུ་ཡོད་ནའང་། ཤེས་རབ་སྡོང་བུ་ལས། མི་ཡི་ཆོས་ལུགས་ལེགས་སྤྱད་ན།། ལྷ་ཡུལ་བགྲོད་པ་ཐག་མི་རིང་།། ལྷ་དང་མི་ཡི་ཐེམ་སྐས་ལ།། འཛེགས་ན་ཐར་པ་གམ་ན་འདུག། ཅེས་དང་། དེ་བཞིན་དུ་ས་པཎ་གྱིས། ལེགས་པར་བརྟགས་ན་ཆོས་ལུགས་མི་འགལ་ཞིང་།། འཇིག་རྟེན་བྱ་བ་རྣམས་ཀྱང་ལེགས་འགྲུབ་པ།། དམ་པ་རྣམས་ཀྱིས་སྤྱོད་ཚུལ་འདི་འདྲ་ཞེས།། བཤད་པ་འདི་ནི་ལེགས་བཤད་རིན་ཆེན་གཏེར།། ཞེས་སོགས་སྔོན་བྱོན་མཁས་པ་མང་པོ་ཞིག་གིས་ཆོས་དང་ཆབ་སྲིད་གཉིས་མི་འགལ་བར་ཞལ་གྱིས་བཞེས་ཤིང་། ལག་ལེན་དུ་བཀལ་ཡོད་པ་རེད། ལོ་རྒྱུས་ཀྱི་ཐོག་ཏུ་ཆབ་སྲིད་ཀྱི་འགྲོ་སྟངས་འདིའི་འོག་ཏུ་གནས་པའི་འབངས་མི་རྣམས་ཀྱང་རྒྱལ་ཁབ་གཞན་པའི་ནང་དུ་བྱུང་མྱོང་བའི་བྲན་གཡོགས་ཀྱི་ལམ་ལུགས་འཇིགས་སུ་རུང་བ་དང་། སྐྱི་གཡའ་བ་དེ་དག་དེ་མཐོང་རྒྱུ་དཀོན་པ་ཡིན། དེ་ནི་རྒྱུ་མཚན་གཞན་གང་ཡང་མ་ཡིན་པར་གོང་དུ་མང་པོ་བཤད་པ་བཞིན་ཆོས་སྲིད་ཟུང་འབྲེལ་བྱས་པའི་ཕན་ནུས་དང་། ཆབ་སྲིད་དེའི་ནང་དུ་བྱམས་པ་སྙིང་རྗེ་ཅན་གྱི་ཆོས་ཀྱི་ལྟ་སྤྱོད་དེ་དག་ཡོད་པའི་བཀའ་དྲིན་ཡིན། བོད་ཀྱི་ཆོས་སྲིད་ཟུང་འབྲེལ་གྱི་ལམ་ལུགས་ཡུན་རིང་ལག་ལེན་དུ་བྱས་པ་ཡིན་ནའང་སྐབས་འགར་མི་བུ་བྱེ་བྲག་པས་བསམ་བློ་གཏོང་སྟངས་དང་། ལག་ལེན་བྱེད་སྟངས་ཀྱི་ཐོག་ནས་མི་མང་དང་སྤྱི་ཚོགས་ལ་བརྡབ་བསིག་ཚབས་ཆེན་དེ་འདྲ་བྱུང་མྱོང་བ་ཡིན། དེ་ནི་ཆོས་སྲིད་ཟུང་འབྲེལ་བྱས་པའི་ཉེས་པ་མ་ཡིན་པར་མགོ་སྡོད་ཀྱི་མི་སྣ་དེ་དག་གིས་ཆོས་སྲིད་ཟུང་འབྲེལ་གྱི་འགྲོ་སྟངས་རྣལ་མ་གཏོར་བཤིག་གཏོང་བའི་མཚན་གཞི་རེད། དཔེར་ན། སངས་རྒྱས་ཀྱི་ཆོས་ཚུལ་དེ་ཉིད་མཐའ་ཡས་པའི་འགྲོ་བ་ཐམས་ཅད་ཀྱི་བདེ་སྐྱིད་བསྐྲུན་བྱེད་དང་། དཀའ་ངལ་སེལ་བའི་ཐབས་ཤེས་ཤིག་ཡིན་ནའང་། མཚམས་རེར་ཆོས་བྱེད་མི་སྣ་རེ་ཟུང་གི་ནོར་འཁྲུལ་གྱིས་མི་མང་དང་། འགྲོ་བ་ལ་གནོད་ཚབས་ཚད་མེད་བཟོ་མྱོང་བ་རེད། དེ་ནི་ཆོས་ཀྱི་གནད་དོན་མ་ཡིན་པར་ཆོས་བྱེད་མི་སྣའི་གནད་དོན་ཡིན་པ་སོགས་བསམ་བློ་གཏན་གཏན་དང་ཏིག་ཏིག་དུ་གཏོང་དགོས་པ་ཡིན།

༢༽

༸གོང་ས་མཆོག་དང་། ཆོས་ཀྱི་སྙིང་པོ་ཅན་གྱི་ཆབ་སྲིད།

སྤྱིར་ན་༸གོང་ས་རྒྱལ་བ་རིན་པོ་ཆེ་ནས་ཕྱི་ལོ་༡༩༥༠ལོར་ནས་བོད་ཀྱི་ལས་དབང་ཧ་ཅང་ཉག་ཕྲ་བའི་སྐབས་དེར་སྲིད་དབང་བཞེས་འདུག དེ་ཡང་དགའ་སྐྱིད་ཀྱི་དགོད་སྒྲས་ཁེངས་པའི་དུས་སུ་དགའ་སྟོན་བྱས་ནས་ཕུལ་བཞག་པ་ཞིག་མ་ཡིན་པར་བོད་ཀྱི་སྲིད་དབང་དེ་ཉིད་སུས་ཀྱང་འགན་ལེན་མི་ཐུབ་པའི་སྒང་དེར་ལྷ་ཡི་ལུང་བསྟན་བྱུང་བའམ། མི་ཡི་གྲོས་ཁ་མཐུན་པ་གང་ཞིག་གིས་དགུང་ལོ་བཅུ་དྲུག་ལས་མ་སོན་པའི་རྒྱལ་བ་རིན་པོ་ཆེའི་ཕྲག་པར་བཀལ་ཡོད་པ་རེད། དེ་ནས་བཟུང་སྟེ་གོང་ས་མཆོག་གིས་ཆོས་ཕྱོགས་ཀྱི་སློབ་གཉེར་ལས་ཀྱང་སྲིད་ཕྱོགས་བོད་འབངས་ཀྱི་བདེ་སྐྱིད་ཀྱི་འགན་ཁུར་ཆེད་དུ་འདུར་དགོས་པ་བྱུང་བ་དང་། སྐབས་དེ་དུས་ཆབ་མདོར་རྒྱ་བོད་དམག་དཔུང་གདོང་ཐུག་ཤོར་ནས་བོད་དམག་རྣམས་གང་ཅིའི་དམག་ལས་ཞན་པས་ཡོངས་སུ་ཕམ་སྟེ་ཆབ་མདོར་རྒྱ་དམག་གིས་བཟུང་ཟིན་ཅིང་། དེ་ནས་རྒྱ་དམག་རྣམས་ལྷ་ས་རུ་ཡོང་བའི་སྦིར་གྲགས་དང་། ལྷ་སའི་སྣོད་བཅུད་གཉིས་ཀྱང་འབྲས་བུ་ཅི་ཞིག་འབྱུང་བ་ཆབ་མདོའི་དམག་འཁྲུག་དེ་ཡིས་གསལ་གསལ་ཐིང་ཐིང་དུ་བཟོས་ཡོད། དེ་ནས་རེ་ཞིག་རྒྱལ་བ་རིན་པོ་ཆེ་སྐུ་འཁོར་ཧྲག་བསྡུས་ཤིག་གནས་སྐབས་སུ་ཉེན་གཡོལ་དུ་གྲོ་མོའི་ཕྱོགས་སུ་ཕེབས་དགོས་བྱུང་འདུག་ཅིང་འདི་ནི་རྒྱལ་སྲིད་ཆོས་སྲིད་ཀྱི་གསེར་ཁྲི་མངའ་གསོལ་ནས་ཟླ་ཤས་ལས་སོང་མེད་པའི་སྐབས་དེར་ཡིན་པས་སྲིད་དོན་པ་གཡེར་པོ་ཆེ་ཐམས་ཅད་ཀྱིས་རྒྱལ་སྲིད་འདི་ཉིད་གཡོལ་དགོས་དོན་ཀྱང་གང་ཡིན་གསལ་ལྷང་ངེར་གྱུར་ཡོད་པ་རེད། ཕ་རོལ་རྒྱ་ཕྱོགས་ནས་དེང་རབས་མཚོན་ཆ་བཀོལ་ཏེ་ཤི་རྨས་བྱས་དང་བྱེད་བཞིན་ཡོད་ནའང་། སྤྱི་ནོར་༸གོང་ས་རྒྱལ་བ་རིན་པོ་ཆེ་མཆོག་ནས། གང་ལ་སེམས་ཀྱི་དམ་པ་རིན་ཆེན་དེ།། སྐྱེས་པ་དེའི་སྐུ་ལ་ཕྱག་འཚལ་ཞིང་།། གང་ལ་གནོད་པ་བྱས་ཀྱང་བདེ་འབྲེལ་བ།། བདེ་བའི་འབྱུང་གནས་དེ་ལ་སྐྱབས་སུ་མཆི།། ཞེས་ཇི་སྐད་གསུངས་པ་བཞིན་རྒྱལ་སྲས་བྱང་ཆུབ་སེམས་དཔའི་སྤྱོད་པ་དེ་དག་ཐུགས་ཉམས་བཞེས་སུ་གནང་ནས་བོད་རྒྱ་གཉིས་མཉམ་གནས་དང་། གཉིས་ཕན་གྱི་ཐབས་ལམ་དང་། གྲོས་མོལ་ཞི་འགྲིག་ཅིག་གི་འོག་ནས་ཐག་གཅོད་ཡོང་རེ་གནང་ཏེ་རྒྱ་ཕྱོགས་ལ་བསྟུན་མཁས་མཛད། དེ་ནས་བཟུང་དེ་རིང་སྤྱི་ནོར་༸གོང་ས་མཆོག་གི་ཆབ་སྲིད་ཀྱི་འགན་དབང་ཡོངས་རྫོགས་བོད་མི་མང་ལ་གནང་བ་དང་། གཞུང་ས་དགའ་ལྡན་ཕོ་བྲང་ཕྱིར་བསྡུ་མཛད་པའི་བར་དེར་ལོ་ངོ་དྲུག་ཅུ་ལས་བརྒལ་བའི་དུས་རིང་ཞིག་སོང་ཟིན་ནའང་རྒྱལ་བ་རིན་པོ་ཆེའི་རྩ་བའི་དགོངས་པ་ལ་འགྱུར་བ་ཅི་ཡང་སོང་མེད་པར་གཉིས་ཕན་གྱི་ལམ་དུ་བསྐྱོད་རྒྱུ་དང་། ལྷག་བསམ་ཟོལ་མེད་ཀྱིས་གྲོས་ཁ་བསྡུར་ནས་བོད་རྒྱའི་དཀའ་རྙོག་སེལ་ཐབས་ལ་འབད་བརྩོན་གནང་བཞིན་པ་རེད།

༣༽

དེ་ལྟར་ལོ་ངོ་དྲུག་ཅུ་ལས་བརྒལ་བ་ཞིག་ཏུ་རྒྱལ་བ་རིན་པོ་ཆེས་དཀྱེལ་ཆེའི་ཐུགས་དགོངས་དང་། ཞིབ་ཅིང་ཕྲ་བའི་བརྟག་དཔྱད་མང་པོ་གནང་མཐར་གཏན་ལ་ཕབ་པའི་ཆབ་སྲིད་ཀྱི་ལམ་བུ་དེ་ནི་གཉིས་ཕན་དབུ་མའི་ལམ་འདི་ཉིད་ཡིན་ནོ།

གཉིས་ཕན་དབུ་མའི་ལམ་གྱི་འབྱུང་ཁུངས་ནི་འཚེ་མེད་ཞི་བའི་ལྟ་གྲུབ་དང་། དེའང་སྟོན་པ་མཉམ་མེད་ཤཱཀྱའི་རྒྱལ་པོའི་ཆོས་ཚུལ་ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པའི་འདི་ཉིད་ལས་བྱུང་བ་རེད། དེ་ཡང་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག ཅེས་སོགས་ཀྱི་ནང་པའི་ཆོས་སྐད་དང་། ལྷག་པར་ཐེག་ཆེན་ཐུན་མོང་མ་ཡིན་པའི་ཆོས་སྐད་དེ་དག་ལས་བསྟན་པའི་མཐའ་ཡས་པའི་སེམས་ཅན་ཐམས་ཅད་བདེ་དང་ལྡན་འདོད་ཀྱི་རྨང་གཞི་ཅན་གྱི་ཆབ་སྲིད་ཅིག་རེད། ཆོས་སྲིད་ཟུང་འབྲེལ་དང་། ནང་པའི་ཆོས་ཀྱི་སྙིང་པོ་ཅན་གྱི་ཆབ་སྲིད་ཟེར་ནའང་གོ་བདེ་བ་རེད། ཕྱི་མི་འགའ་ཞིག་གིས་༸གོང་ས་མཆོག་གི་འཚེ་བ་མེད་པའི་ལྟ་གྲུབ་འདི་ཉིད་རྒྱ་གར་གྱི་མེས་པོ་དམ་པ་མ་ཧཱ་ཏ་མ་གྷན་དྷེའི་དགོངས་པ་དང་། རྒྱལ་བ་རིན་པོ་ཆེའི་དེའི་རྗེས་འབྲང་དང་། རྒྱུན་འཛིན་ཡིན་པར་བསམ་ནས་དཔྱད་རྩོམ་དང་། འདྲ་རིས་མང་པོ་ཡོད་པ་རེད། རླབས་ཆེན་གྱི་སྐྱེས་བུ་དམ་པ་མ་ཧཱ་གྷན་དྷི་མཆོག་འཚེ་མེད་ཞི་བའི་ལྟ་བ་ལྷུར་ལེན་མཁན་ཡིན་ནའང་། གཙོ་བོ་ནི་བདེན་པའི་ཨུ་ཚུགས་ཀྱི་ཤིང་རྟའི་སྲོལ་འབྱེད་ལྟ་བུ་རེད་བསམ།

འཚེ་མེད་ཞི་བའི་ལྟ་བ་འདི་ཉེ་ཆར་གསར་དུ་བྱུང་བ་མ་ཡིན་པར་ལོ་ངོ་ཉིས་སྟོང་གི་སྔོན་ནས་སངས་རྒྱས་བཅོམ་ལྡན་འདས་ཀྱི་ནམ་མཁའ་དང་མཉམ་པའི་སེམས་ཅན་ཐ་ན་སྲོག་ཆགས་གྲོག་སྦུར་ཚུན་ཆད་མཉམ་པར་ཉིད་དུ་གཟིགས་པའི་བྱམས་བརྩེ་རང་བཞིན་ཅན་གྱི་ཆོས་ཀྱི་ཉམས་ལེན་གྱི་སྙིང་པོ་ཡིན་པ་མ་ཟད་སྒོ་གསུམ་གྱི་སྤྱོད་པ་མཐའ་དག་ཕྱག་རྒྱ་འདི་ལས་མི་གཡོལ་བ་རེད། དེས་ན་འཇིག་རྟེན་འདིའི་ཐོག་ཏུ་འཚེ་མེད་ཞི་བའི་ལྟ་གྲུབ་ཀྱི་མཁན་པོ་ཞིག་འདེམས་དགོས་ན་དེ་ནི་སྟོན་པ་མཉམ་མེད་ཤཱཀྱ་ཐུབ་པ་ཡིན་ངེས་པ་དང་། ད་ལྟ་འཚོ་ཞིང་བཞུགས་པའི་འཚེ་མེད་ཞི་བའི་མཁན་པོ་ནི་སྟོན་པ་ཏཱ་ལའི་བླ་མ་ཡིན་པ་རེད། དེ་དག་ནི་དབུ་མའི་ལམ་གྱི་འབྱུང་ཁུངས་དེ་ཡིན་ནོ།

དབུ་མའི་ལམ་གྱི་ངོ་བོ་འདྲ་བ་ནི་མཁས་པ་སོ་སོ་ནས་འབྲེལ་བཤད་མང་པོ་གནང་ཡོད་ཅིང་རིགས་སྟོབས་ཅན་དེ་དག་གིས་མཐའ་བརྒྱད་དང་། མཐའ་བཞི་སོགས་ཀྱིས་སྤྲོས་བཤད་གནང་ཡོད། དེ་དག་བསྡུས་ན་ཕར་མཐའ་དང་། ཚུར་མཐའ་ཟེར་ནའང་འགྲིག་ངེས་ཀྱང་། གནད་དུ་སྨིན་ཤོས་འདྲ་བ་ནི་རྒྱ་མཐའ་དང་། བོད་མཐའ་ཟེར་ན་ཡིན་རྒྱུ་རེད། ད་འོ་ན་རྒྱ་མཐའ་དེ་གང་ཞེ་ན། རྒྱ་ནག་དབུས་གཞུང་གིས་ད་ལྟ་བར་དུ་བོད་ཐོག་འཛིན་པའི་སྲིད་ཇུས་བོད་ཀྱི་སྣོད་བཅུད་རིགས་གཞུང་དང་བཅས་པ་རྩ་བརླག་གཏོང་སྟེ། བོད་མི་རིགས་དེ་ཉིད་རྒྱའི་ནང་དུ་ཐིམས་སུ་འཇུག་རྒྱུའི་སྲིད་ཇུས་དེ། རྒྱ་མཐའ་དང་། བོད་ཀྱི་སེམས་ཁམས་སུ་ཡོད་པའི་བོད་རང་བཙན་དང་། བོད་སྒེར་ཚུགས་ཅན། བོད་དེ་གཞན་ལ་ལྟོས་མེད་ཟུར་དུ་སྡོད་རྒྱུ་དེ་བོད་མཐའ་རེད། མཐའ་དེ་གཉིས་ཀ་མ་ཡིན་པར་བོད་ཀྱི་ཕྱི་སྲིད་དང་། བོད་ཀྱི་བདག་དབང་དེ་དག་རྒྱ་ནག་གཞུང་གིས་འཛིན་རྒྱུ་དང་། བོད་ཀྱི་ཆོས་དང་རིག་གཞུང་ཁོར་ཡུག་སོགས་ཉམས་པ་སླར་གསོ་དང་། མི་ཉམས་གོང་འཕེལ་སོགས་བོད་ཀྱི་ལས་ཀ་བོད་པས་བྱེད་རྒྱུ་ཡོད་པའི་ཐབས་ལམ་དང་། བརྒྱུད་ལམ་དེ་ནི་གཉིས་ཕན་དབུ་མའི་ལམ་གྱི་ངོ་བོ་རེད།

དབུ་མའི་ལམ་གྱི་འབྲས་བུ་ག་རེ་རེད་ཅེས་ན། དེ་ནི་ད་ལྟ་ཏོག་ཙམ་སྔ་སོང་བའི་དྲི་བ་ཞིག་རེད། འོན་ཀྱང་དེ་སྔའི་བར་དུ་གཉིས་ཕན་གྱི་དགོངས་པ་འདིས་འབྲས་བུ་གཡུར་དུ་ཟ་བ་མང་པོ་བླངས་ཡོད་པ་དཔེར་ན་འཛམ་གླིང་ནོར་བྷེལ་ཞི་བདེའི་གཟེངས་རྟགས་ཕུལ་བ་དེ་ཡང་འཛམ་གླིང་རྒྱལ་སྤྱིའི་ཐོག་ཏུ་དྲང་བདེན་གྱི་ལྟ་བ་དང་། ལྷག་པར་བོད་རྒྱའི་བར་དུ་གཉིས་ཕན་གྱི་དགོངས་པ་དེ་དག་ལ་བསྔགས་བརྗོད་དང་རྒྱབ་སྐྱོར་གྱི་ཚུལ་དུ་ཕུལ་ཡོད་པར་སྐབས་དེ་དུས་ནོར་བྷེལ་ཞི་བདེའི་གཟེངས་རྟགས་འབུལ་བའིབསྒྲགས་གཏམ་དུ་གསལ་བ་ཡིན་ཏེ། དེ་ལས། "ཕྱི་ལོ་༡༩༨༩ ལོའི་ཞི་བདེའི་གཟེངས་རྟགས་བོད་ཆོས་སྲིད་གཉིས་ཀྱི་དབུ་ཁྲིད་༸གོང་ས་སྐྱབས་མགོན་ཏཱ་ལའི་བླ་མར་འབུལ་གཏན་ཁེལ་བ་ཡིན། ཁོང་གིས་བོད་རྒྱའི་དཀའ་རྙོག་ཐད་ཕན་ཚུན་བཟོད་སྒོམ་དང་། གུས་བརྩི་ལྡན་པའི་མཛད་ཕྱོགས་ཁོ་ན་གནང་ཞིང་། བོད་མི་རིགས་ཀྱི་རིག་གཞུང་དང་ལོ་རྒྱུས་ཀྱི་ཤུལ་རྒྱུན་བཟང་པོ་རྣམས་གཅེས་སྲུང་དང་རྩ་མེད་དུ་མི་འགྲོ་བའི་བདག་གཅེས་གནང་བའི་ཐོག འཛམ་གླིང་སྟེང་དཀའ་རྙོག་ཡོད་བཞིན་པ་རྣམས་ལྷིང་འཇག་བག་ཕེབས་ཐུབ་ཐབས་དང་། འགྲོ་བ་མིའི་རིགས་ཀྱི་ཐོབ་ཐང་། ཁོར་ཡུག་སྲུང་སྐྱོབ། ཐ་ན་སྲོག་ཆགས་ཡོངས་ལ་བདེ་བ་འབྱུང་ཐབས་ཀྱི་ཐུག་ཁུར་བཞེས་ཡོད།" ཅེས་གསལ་ཞིང་དེའི་སྐབས་སུ་དབུ་མའི་ལམ་ཟེར་ནས་གཏན་ལ་ཕབ་ཐུབ་མེད་ནའང་། རྒྱ་བོད་གཉིས་ཀྱི་གནད་དོན་དེའི་ཐད་དུ་སྔ་མོ་ནས་བཟོད་སྒོམ་དང་གཉིས་ཕན་གྱི་ལམ་དབུ་མ་ཞིག་དགོངས་པ་བཞེས་ཡོད་ཚུལ་སྔར་ཞུས་པ་བཞིན་རྒྱལ་སྲིད་ཆོས་སྲིད་ཀྱི་མཛད་འཕྲིན་བསྐྱངས་པ་ནས་དགོངས་པ་དེ་དག་ཡོད་པ་རེད། དེ་བཞིན་དུ་ཨ་རིའི་གསེར་གྱི་རྟགས་མ་ཕུལ་བ་ཡང་དེ་བཞིན་དུ་འཛམ་གླིང་ཞི་བདེ་དང་། བོད་རྒྱ་གཉིས་ཕན་གྱི་ལམ་དབུ་མ་ལ་བསྔགས་བརྗོད་ཀྱིས་ཕུལ་ཡོད་པ་ཡིན་ཏེ། ༢༠༠༦་ཟླ་༩་པའི་ཚེས་༢༧ཉིན་ཨ་རིའི་གྲོས་ཚོགས་གོང་འོག་གཉིས་ཀྱིས་༸གོང་ས་མཆོག་ལ་གསེར་གྱི་རྟགས་མ་འབུལ་བའི་ཁྲིམས་གཞི་གྲོས་ཆོད་དུ་སྲིད་འཛིན་བྷུ་ཤུས་མཚན་རྟགས་གནང་བའི་རྩ་འཛིན་གྱི་བསྒྲགས་གཏམ་དོན་ཚན་བཞི་པའི་ཐད་དུ། "༸་གོང་ས་༸སྐྱབས་མགོན་ཏཱ་ལའི་བླ་མ་མཆོག་ནི་འཛམ་གླིང་ཁྱོན་ཡོངས་སུ་ཞི་བདེ་དང་། ལྷག་པར་དབུ་མའི་ལམ་གྱི་མཛད་ཐབས་ལ་བརྟེན་ནས་བོད་ཀྱི་གནད་དོན་སེལ་རྒྱུའི་འབད་བརྩོན་གནང་བཞིན་ཡོད་པར་བརྟེན། སྤྱི་ལོ་༡༩༨༩ ལོར་ནོར་བྷེལ་ཞི་བདེའི་གཟེངས་རྟགས་གྱི་བྱ་དགའ་འབུལ་བཞེས་གནང་ཡོད།  "ཅེས་གསལ་ཡོད། དེ་བཞིན་དུ་གྲངས་ཀྱིས་མི་ལངས་པའི་གཟེངས་རྟགས་ཕལ་མོ་ཆེར་ཆབ་སྲིད་ཀྱི་དགོངས་པ་བཞེས་སྟངས་དམིག་བསལ་བ་འདི་ལ་འབུལ་བཞིན་ཡོད་པ་རེད་མ་གཏོགས་ཆོས་ཕྱོགས་ཀྱི་ཉམས་ལེན་གཅིག་པུ་ལ་དེ་ཙམ་དོ་སྣང་བྱེད་ཀྱི་ཡོད་པ་མ་རེད་དོ།། ཆབ་སྲིད་ཀྱི་དགོངས་པ་དམིག་བསལ་བ་དེ་ནི་འཇིག་རྟེན་གྱི་རྙོག་འཛིང་མཐའ་དག་ཕན་ཚུན་བསམ་ཤེས་དང་། གུ་ཡངས་ཀྱི་སྒོ་ནས་སེལ་ཐབས་དང་། ལྷག་པར་བོད་རྒྱའི་དཀའ་རྙོགས་དེའང་གཉིས་ཕན་དབུ་མའི་ལམ་གྱིས་སེལ་དགོས་པའི་རླབས་ཆེན་གྱི་དགོངས་པ་དེ་དག་ཡིན་པར་ནི་གཟེངས་རྟགས་འདི་དག་ཕུལ་ཚུལ་ལ་བསམ་ན་ཆེས་གསལ་ལོ།། དེ་ནི་༸གོང་ས་མཆོག་གི་མཛད་འཕྲིན་ནུབ་ཕྱོགས་ཀྱི་ཡུལ་གྲུས་གཙོས་པའི་རང་དབང་གིས་འཚོ་བཞིན་པ་དག་གིས་སེམས་ཀྱི་རྒྱགས་ཕྱེ་དུ་འགྱུར་ཚུལ་ཡིན། ད་འོ་ན་རྒྱ་ནག་གི་ཡུལ་གྲུ་དག་ཏུ་མཛད་འཕྲིན་དེ་དག་གིས་གཡོ་འགུལ་ཅི་ཡང་མེད་ན་དགོས་ས་རུ་མེད་ལ་མི་དགོས་ས་རུ་ལྷག་པས་ཆབ་སྲིད་འདི་ཉིད་ཐབས་རེ་སྡུག་སྙམ་པ་འབྱུང་སྲིད་ནའང་། རྒྱ་ནག་གཞུང་གི་ཆབ་སྲིད་མི་སྣ་རྣམས་ནི་མིག་དང་། རྣ་བ་བཀབ་ནས་ཡོད་པས་མཛད་འཕྲིན་འདི་དག་རྒྱུ་ལམ་མེད་པ་རེད། མང་ཚོགས་རྣམས་ནི་ལོ་རེ་ནས་ལོ་རེར་རང་དབང་དང་མང་གཙོའི་ཕྱོགས་ལ་གོམས་ཁ་རིང་ནས་རིང་དུ་འདོར་བཞིན་ཡོད་པ་དང་། དེས་ན་ལྷག་པར་༸གོང་ས་མཆོག་གི་ཞི་བདེ་དང་། རང་དབང་སྙིང་པོ་ཅན་གྱི་ལྟ་སྤྱོད་འདི་དག་གིས་ཡིད་དབང་ཡོངས་སུ་བཀུག་ནས་ལོ་རེ་ནས་ལོ་རེ་མི་མངོན་པའི་གྲུ་ཟུར་ཞིག་ནས་མི་སེམས་ས་ཡ་མང་པོ་ཞིག་བཞུགས་སྒར་དྷ་རམ་ས་ལའི་ཕྱོགས་སུ་གཏད་བཞིན་ཡོད་ཅིང་། དེ་བཞིན་དུ་རང་དབང་ལུང་པར་འཚོ་བའི་རྒྱ་རིགས་ཤེས་ཡོན་པ་དག་གིས་རྒྱལ་བ་རིན་པོ་ཆེའི་ཞབས་རྡུལ་དང་བས་བླངས་ནས་བོད་རྒྱ་གཉིས་ཀྱི་དཀའ་ཁག་དེ་དག་ལྷག་བསམ་རྣམ་པར་དག་པས་སེལ་ཐབས་སུ་རྒྱབ་སྐྱོར་བྱེད་བཞིན་ཡོད་པ་དང་། རང་དབང་གནས་པའི་རྒྱ་རིགས་དེ་དག་གི་རྒྱུད་ནས་རྒྱ་ནང་དུ་ཡོད་པའི་དད་ལྡན་དང་། དོགས་པ་ཅན་མང་པོ་ཞིག་གིས་གློག་ཀླད་རྒྱུད་ནས་དྲི་གཞི་ལ་ལན་འདེབས་དང་། དོགས་པ་ལ་གསལ་བཤད། བྱིན་རློབས་ཞལ་མཇལ་གསུངས་ཐོས་བྱེད་པའི་ལས་འགུལ་ཞིག་དཀྱིལ་ནས་བརྡོལ་བཞིན་ཡོད་པ་འདི་དག་ནི་ཕྱོགས་གཉིས་ཀ་ལ་བསམ་བློ་གཏོང་ས་ཡོད་པའི་རྨང་གཞིའི་ཐོག་ནས་ཡོང་གི་ཡོད་པ་དང་། གཉིས་ཕན་གྱི་རླབས་ཆེན་གྱི་དགོངས་པ་འདིའི་འབྲས་བུ་ཡིན་པ་རེད། ད་དུང་ཡང་གཉིས་ཕན་དབུ་མའི་ལམ་དུ་ཞེ་འཁྲེག་དང་། དོགས་པ་སྤུ་ཙམ་མེད་པར་ཡིད་ཆེས་ཆེན་པོས་བོད་གཞིས་བྱེས་གཉིས་ཀས་ཤར་བསྐྱོད་བྱོས་དང་། བོད་རྒྱ་མཉམ་གནས་དང་། གཞིས་བྱེས་ལྷན་འཛོམས་ཀྱི་རྨི་ལམ་དེ་དག་མངོན་འགྱུར་དུ་ཡོང་བ་གདོན་མི་ཟའོ།། །།
༢༠༡༡ལོའི་ཟླ་ ༦ པའི་ཚེས་ ༧ ཉིན།
༸གོང་ས་རྒྱལ་བ་རིན་པོ་ཆེའི་འཁྲུངས་སྐར་༧༦པའི་སྐབས་ཀྱི་གཏམ་བཤད་མ་ཟིན།

བཅར་འདྲི། དུས་བབ་ལས་དྲངས།

མི་ལོ་གཉིས་ཀྱི་གོང་བྱུང་བའི་ཁམས་སྐྱེ་རྒུ་མདོའི་ས་ཡོམ་གྱི་རང་བྱུང་གོད་ཆག་དེས། ས་གནས་བོད་མི་ཁྲི་ཕྲག་མང་པོར་ལོ་རྒྱུས་ཐོག་སྔར་བྱུང་མ་མྱོང་བའི་ཤི་རྨས་ཚབས་ཆེན་ཐེབས་ཡོད། རྒྱ་ནག་གི་བརྒྱུད་ལམ་ཁག་ཏུ་སྲིད་གཞུང་གིས་ཡུལ་ཤུལ་གནོད་ཐེབས་མང་ཚོགས་ལ་འཚོ་བའི་རོགས་རམ་གང་ལེགས་བྱས་ཡོད་ཚུལ་དང་། འདས་པའི་ལོ་ངོ་གཉིས་ཀྱི་ཡུལ་ཤུལ་འཛུགས་བསྐྲུན་ལེགས་འགྲུབ་བྱུང་ཡོད་པ་མ་ཟད། ས་གནས་མང་ཚོགས་རྣམས་འཚོ་བ་གསར་པའི་ལོངས་སྤྱོད་ལ་རོལ་བཞིན་ཡོད་སྐོར་ཁྱབ་བསྒྲགས་བྱེད་ཀྱིན་ཡོད་སྟབས། འདི་གའི་གསར་འགོད་པས་ས་ཡོམ་གྱི་གནོད་འཚེ་ཕོག་པའི་ཁམས་ནང་ཆེན་གྱི་གྲྭ་བསམ་གྲུབ་ལགས་སུ།  སྐྱེ་རྒུ་མདོའི་དངོས་ཡོད་གནས་སྟངས་སྐོར་བཅར་འདྲི་ཞུས་ཡོད།

   

དྲི་བ། ཕྱི་ལོ་ ༢༠༠༨ ལོའི་ཕྱི་ཟླ་ ༤ ཚེས་ ༡༤ ཉིན་ཁམས་སྐྱེ་རྒུ་མདོར་ས་ཡོམ་རྒྱག་སྐབས་ཀྱི་གནས་སྟངས་དངོས་གང་འདྲ་ཡིན་ནམ།

ལན། ས་ཡོམ་རྒྱག་སྐབས་ང་རང་ཡུལ་ཤུལ་རྫོང་འབུམ་ཆུང་དགོན་དུ་ཡོད། ང་ཚོ་དགོན་པའི་ཁང་པ་མང་ཆེ་བ་ཐོག་རྩེག་གཉིས་དང་གསུམ་ཅན་རེད། ཁང་པའི་སྤུས་ཀ་ཡག་པོ་མེད་སྟབས། ས་ཡོམ་རྒྱག་སྐབས་འདུ་ཁང་དང་གྲྭ་ཤག་ལ་གཏོར་བཤིག་ཚབས་ཆེན་ཐེབས་ཏེ། གྲྭ་པ་ ༡ གྲོངས་པ་རེད། གྲྭ་པ་ ༦ ལ་རྨས་སྐྱོན་ཆེན་པོ་ཕོག་པ་རེད། མ་གཞི་ཉིན་དེ་ནི་དགོན་པའི་གསོ་སྦྱོང་ལ་འཁེལ་ཡོད་སྟབས། གྲྭ་བ་མང་ཆེ་བ་སྔ་མོ་ནས་ཡར་ལངས་འདུག ང་རང་གཉིད་ཉལ་བསྡད་ཡོད། ཁང་པའི་སྤུས་ཀར་བལྟས་ན་སྲོག་ཉེན་ལས་ཐར་ཐབས་མེད་ཀྱང་། བོད་པའི་ཁ་རྒྱུན་ལ་ལམ་འགྲོ་ཞེས་ལབ་སྲོལ་ཡོད་པ་ལྟར། ཞོགས་པ་དེར་ལམ་འགྲོ་རྒྱུགས་ཏེ་ང་ཚོ་ཕྱིར་ཐོན་ཐུབ་པ་རེད། ས་ཡོམ་བརྒྱབ་མཚམས་ང་ཕྱིར་ཐོན་པ་ཡིན། འཇིགས་སྣང་དེའི་འོག་ནས་ངའི་ས་ཡོམ་དེ་དགོན་པ་ཙམ་མིན་པར་ཡུལ་ཤུལ་ཡོངས་ལ་བརྒྱབ་ཡོད་པ་རེད་དྲན་སོང་། དེ་ནས་ནང་མིར་ཁ་པར་བཏང་སྐབས་འབྲེལ་གཏུག་བྱེད་ཐུབ་ཀྱི་མི་འདུག་པས། སེམས་ཁྲལ་སྔར་ལས་ཇེ་ཆེར་ཕྱིན་སོང་། ས་ཡོམ་བརྒྱབ་སྟེ་དུས་ཡུན་ཆུ་ཚོད་ཁ་ཤས་རིང་དགོན་པའི་ཉེ་འདབས་ཀྱི་གྲོང་སྡེ་ཁག་ལ་གྲག་འགུལ་ཅི་ཡང་མི་འདུག ང་ཚོའི་གྲས་སུའང་ངུ་མཁན་གཅིག་ཀྱང་མེད་པར་ཚང་མ་ཧང་སངས་ནས་བསྡད་འདུག དུས་ཡུན་གང་འཚམ་ཞིག་གི་རྗེས་སུ། མིའི་ངུ་སྐད་དང་འབོད་སྒྲ་སོགས་གོ་ཡོང་གི་འདུག་པས།  གཞི་ནས་གྲོང་སྡེ་དེར་ས་ཡོམ་བརྒྱབ་པ་ཤེས་རྟོགས་བྱུང་བ་རེད། གྲོང་སྡེ་དེ་ཚོར་ས་ཡོམ་རྒྱག་ཚད་ཡུལ་ཤུལ་ཁུལ་དང་གཅིག་མཚུངས་ཡིན་ཀྱང་། ཁོང་ཚོའི་ཁང་པར་གཏོར་བཤིག་ཐེབས་ཡོད་པ་ལས་མི་ལ་སྲོག་སྐྱོན་ཆེན་པོ་བྱུང་མི་འདུག ས་ཡོམ་བརྒྱབ་སྟེ་ཉིན་གསུམ་ཕྱིན་ཡོད་ནའང་། ས་གནས་དེར་རྒྱ་མིའི་རོགས་སྐྱོར་བྱེད་མཁན་གཅིག་ཀྱང་འབྱོར་མི་འདུག རྗེས་སུ་ས་གནས་མང་ཚོགས་ཀྱིས་བཤད་ན། ས་གནས་དེར་ཟླ་བ་གཅིག་རིང་ཉེན་རྟོག་པ་འབྱོར་མི་འདུག་ཟེར། ཕྱི་ཚེས་ ༡༤ ནས་ ༡༦ ཉིན་བར་ང་ཚོ་དགོན་པའི་གྲྭ་བ་ཚོ་ཁྲ་འགུ་སྡེ་བ་སོགས་གྲོང་སྡེ་འགར་ཕྱིན་སྟེ། ས་འོག་ཏུ་བཅུག་ཡོད་པའི་བེམ་པོ་ཕྱིར་བཏོན་པ་ཡིན། སྐབས་མཚམས་དེར། ཡུལ་ཤུལ་ཁུལ་ཐོག་ཏུ་ཡོད་པའི་ངའི་གཅེན་པོས་ཁ་པར་ཡོང་སྟེ། ང་ཚོའི་ནང་མི་བརྒྱད་ཡོད་པ་ཚང་མར་སྲོག་གི་ཉེན་ཁ་མི་འདུག་ལབ་བྱུང་། དེ་ནས་བློ་གཅིག་སེམས་གཅིག་གིས་མྱུར་སྐྱོབ་ལས་ཀར་ཞུགས་པ་ཡིན།

དྲི་བ། ཁྱེད་རང་སྐྱེ་རྒུ་མདོའི་མྱུར་སྐྱོབ་ལས་ཀར་ཞུགས་སྟངས་གང་འདྲ་ཡིན་མིན་དང་། སྐབས་དེའི་གནས་སྟངས་ཇི་འདྲ་ཡིན།

ལན། ཕྱི་ཚེས་ ༡༦ ཉིན་ང་ཚོ་དགོན་པའི་གྲྭ་བ་ ༨༠ ཙམ་གོམ་པ་བརྒྱབ་སྟེ། ཡུལ་ཤུལ་ཁུལ་ཐོག་ཏུ་སོང་བ་ཡིན། གྲོང་ཁྱེར་བཞི་མདོ་དང་སྲིད་གཞུང་། དམག་སྒར་བཅས་སུ་དམག་མི་འགའ་མཐོང་རྒྱུ་ཡོད་པ་ལས། གྲོང་ཁྱེར་མཐའ་མཚམས་ཁག་ཏུ་དམག་མི་མཐོང་རྒྱུ་མི་འདུག ས་གནས་སུ་འབྱོར་མཚམས་ཐོག་མར་སློབ་གྲྭ་ཁག་ཏུ་བསྐྱོད་དེ། ས་འོག་ཏུ་བཅུག་ཡོད་པའི་བེམ་པོ་ཕྱིར་འདོན་བྱས་པ་ཡིན། སྐབས་དེར། བོད་ཀྱི་གྲྭ་བ་ཚོ་སྔ་ས་ནས་འབྱོར་ཏེ། ས་བསྔོགས་ནས་བེམ་པོ་ཕྱིར་འདོན་བྱེད་ཀྱིན་འདུག ཉིན་ཤས་རྗེས་དམག་མི་རུ་ཁག་ཅིག་དེར་འབྱོར་སོང་། དམག་མི་དེ་ཚོས་ས་རྐོ་རྡོ་སློག་གི་ལས་ཀར་ཤུགས་རྒྱག་གི་མི་འདུག བོད་ཀྱི་གྲྭ་བ་ཚོས་ས་འོག་ནས་བེམ་པོ་གསར་དུ་རྙེད་སྐབས། དམག་མི་དེ་ཚོ་ལམ་སེང་རུབ་རུབ་བྱས་ཡོང་སྟེ། བེམ་པོ་གནམ་ལ་བཀྱགས་ཏེ་འཁྱེར་འགྲོ་གི་འདུག ཁོང་ཚོར་པར་རྒྱག་མཁན་དང་བརྙན་ལེན་མཁན་གྱི་རྒྱ་མི་མང་པོ་འདུག ཁོང་ཚོའི་བྱེད་སྟངས་དེར་བལྟས་ན། བརྙན་འཕྲིན་ནང་ཁྱབ་བསྒྲགས་བྱ་རྒྱུ་ཙམ་ལས་ལྷག་བསམ་རྣམ་དག་འདུག་བསམ་པ་ཞིག་མི་འདུག མྱུར་སྐྱོབ་ཁྲོད་དངོས་གནས་དཀའ་ལས་རྒྱག་མཁན་དགེ་འདུན་པ་དང་བོད་པ་ཚོ་རེད་འདུག

དྲི་བ། ས་ཡོམ་སྐབས་རོགས་སྐྱོར་དུ་འབྱོར་མཁན་ཐོག་མ་སུ་སུ་ཡིན་པ་དང་ཁོང་ཚོས་ལས་ཀ་གཙོ་བོ་ཅི་ཞིག་བསྒྲུབས་ཡོད།

ལན། མྱུར་སྐྱོབ་ལས་ཀའི་ནང་ཞུགས་མཁན་གཙོ་བོ་བོད་ཀྱི་དགེ་འདུན་པ་ཚོ་རེད། ཐོག་མར་འབྱོར་མཁན་གྲས་སུ་རྫ་སེར་ཤུལ་དགོན་པ་དང་གསེར་རྟ་བླ་རུང་སྒར། རྫོང་གསར་བཤད་གྲྭ  རྫོགས་ཆེན་དགོན་པ། རྔ་པ་ཀིརྟི་དགོན་པ་སོགས་མདོ་དབུས་ཁམས་གསུམ་ནས་ཕེབས་འདུག ས་ཡོམ་བརྒྱབ་པའི་ཉིན་གསུམ་པ་ནས་བོད་ཀྱི་ས་གནས་གང་ས་ནས་མར་དང་རྩམ་པ། བག་ལེབ་སོགས་འབྱོར་ཡོད་སྟབས། གནོད་ཐེབས་མང་ཚོགས་ལ་ཁ་ཡོད་ལག་ཡོད་ཀྱི་ཕན་ཐོགས་ཆེན་པོ་བྱུང་སོང་། ཉིན་ལྔ་པ་ནས་རྒྱ་གཞུང་གིས་མང་ཚོགས་ཀྱིས་འཁྱེར་ཡོང་བའི་ཟ་མ་སྤྲད་ན་འགྲིག་གི་མ་རེད། དེའི་ཚབ་ཏུ་སྲིད་གཞུང་གིས་སྤྲད་པའི་སྟབས་བདེ་ཐུག་པ་དང་བསིལ་ཆུ་སོགས་སྤྲོད་རྒྱུ་ཡིན་ ཞེས་བཤད་སོང་། ཁོང་ཚོས་སྤྲོད་ཀྱི་ཡིན་ལབ་ཀྱང་ཉིན་ཤས་རིང་ཟ་མ་མ་སྤྲད་པའི་དབང་གིས། མང་ཚོགས་ལ་ཟ་མའི་དཀའ་ངལ་སོགས་འཕྲད་པ་རེད། ཉིན་དེ་ཚོར། ངའི་སེམས་ལ་བོད་མི་རིགས་རྡོག་རྩ་གཅིག་སྒྲིལ་ཡིན་པ་དེ། ཡུལ་ཤུལ་ལ་ས་ཡོམ་བརྒྱབ་པ་དེའི་ཐོག་གསལ་པོར་མཚོན་ཐུབ་ཀྱི་འདུག ལྷག་པར་དུ། མདོ་དབུས་ཁམས་གསུམ་གྱི་དགོན་གྲོང་གཉིས་ཀྱིས་གནོད་ཐེབས་ས་ཁུལ་ལ་སྒོར་མོ་དང་ཟ་མའི་རོགས་རམ་གནང་བ་དང་། འདས་པོར་བསྔོ་བ་སྨོན་ལམ་གང་རྒྱས་བྱས་པ་དེས། ང་ཚོར་སེམས་འགུལ་ཚད་མེད་ཅིག་ཐེབས་བཅུག་སོང་།

དྲི་བ། ངལ་སེལ་རོགས་སྐྱོར་ཁྲོད་ཁྱེད་རང་ངོས་ནས་བེམ་པོ་ཅི་ཙམ་ཕྱིར་འདོན་བྱས་ཡོད་པ་དང་། བེམ་པོ་རྣམས་ཇི་ལྟར་ཞུགས་འབུལ་བྱས་པ་རེད། 

ལན། ང་ཚོས་བེམ་པོ་མང་པོ་ཞིག་ཕྱིར་འདོན་བྱེད་ཐུབ་ཡོད་ཀྱང་ས་འོག་ནས་ཕྱིར་འདོན་སྐབས་ཕལ་ཆེ་བ་གྲོངས་ཚར་འདུག  ཕྱི་ཚེས་ ༡༨ ཉིན་ང་ཚོ་ཁུལ་སློབ་འབྲིང་དུ་ཕྱིན་པ་ཡིན། སློབ་གྲྭ་དེར་སློབ་ཕྲུག་མང་པོ་ཞིག་ས་འོག་ལ་མནན་ཏེ་འདས་གྲོངས་སུ་ཕྱིན་འདུག དེའི་ནང་སློབ་ཕྲུག་གསུམ་ལ་རྨས་སྐྱོན་གང་ཡང་མ་ཕོག་མོད་བཀྲེས་ལྟོགས་ཀྱིས་མནར་ཏེ་གྲོངས་འདུག བེམ་པོ་ཕྱིར་འདོན་བྱས་རྗེས་བདག་པོ་ཡོད་ན་བདག་པོར་རྩིས་སྤྲོད་པ་དང་བདག་པོ་མེད་ན། བེམ་པོ་ཚང་མ་དུས་གཅིག་ཏུ་ས་དོང་བརྐོས་ཏེ་ནང་དུ་ལྡུག་གིན་འདུག བེམ་པོ་གང་རག་པ་རྣམས་བསྡུ་རུབ་བྱས་མཐར་མཉམ་དུ་མེར་བསྲེགས་བཏང་བ་རེད། བེམ་པོ་མར་བསྲེགས་གཏོང་སྐབས། དགེ་འདུན་པ་ཚོས་བསྔོ་བ་སྨོན་ལམ་གསུངས་པ་རེད། མང་ཚོགས་རྣམས་མཐའ་ན་ངུ་བཞིན་པ་མ་ཟད། ཁ་ཤས་ཀྱིས་ཡིད་བཞིན་ནོར་བུ་མཁྱེན་ཟེར་ནས་ངུ་འབོད་སོགས་བྱེད་ཀྱི་འདུག

དྲི་བ། ས་ཡོམ་བརྒྱབ་རྗེས་བོད་ནང་༧གོང་ས་མཆོག་གནོད་ཐེབས་ས་ཁུལ་དུ་ཕེབས་ཀྱི་རེད་ཟེར་བའི་གླེང་སློང་ཤུགས་ཆེར་བྱུང་བ་རེད། སྐབས་དེར། མང་ཚོགས་ཀྱིས་༧གོང་ས་མཆོག་བོད་དུ་ཕེབས་རྒྱུར་རེ་བ་ཅི་ཙམ་རྒྱག་གི་འདུག

ལན། ༧སྐྱབས་མགོན་རིན་པོ་ཆེ་མཆོག་བོད་མི་ཚོའི་ཚེ་འདི་ཕྱི་གཉིས་ཀྱི་སྐྱབས་ཡུལ་བླ་མ་ཆགས་ཡོད་སྟབས། ཡུལ་ཤུལ་གནོད་ཐེབས་མང་ཚོགས་གཙོས་པའི་ཞིང་ཆེན་དང་ས་གནས་གཞན་ནས་ཡོང་བའི་རོགས་སྐྱོར་བྱེད་མཁན་ཚོས།  ༧སྐྱབས་མགོན་རིན་པོ་ཆེ་བོད་དུ་ཕེབས་རྒྱུར་རེ་བ་ཆེན་པོ་བརྒྱབ་སོང་། ཁོང་བོད་དུ་ཕེབས་རྒྱུའི་ཆེད་ང་ཚོའི་ཕྱོགས་ནས་སྲིད་འཛིན་ཧུའུ་ཅིན་ཐོ་ལ་སྙན་ཞུ་ཕུལ་བ་ཡིན། ང་རང་ལ་ཆ་བཞག་ནའང་། སྐྱབས་མགོན་རིན་པོ་ཆེ་ཡུལ་ཤུལ་དུ་ཕེབས་རྒྱུར་རེ་བ་ཆེན་པོ་བརྒྱབ་པ་ཡིན། འོན་ཀྱང་། རྒྱ་ནག་གི་དཔོན་རིགས་ཚོ་ཡུལ་ཤུལ་ཁུལ་དུ་གཅིག་རྗེས་གཉིས་མཐུད་ཀྱིས་ཡོང་བ་དེས། རིན་པོ་ཆེ་བོད་དུ་ཕེབས་རྒྱུར་འགོག་རྐྱེན་འཕྲད་ཀྱི་རེད་སྙམ་པའི་དོགས་པ་ཞིག་སྐྱེས་སོང་ལ། ཉིན་དེ་ནས་བཟུང་རིན་པོ་ཆེ་མཆོག་ཕེབས་རྒྱུའི་རེ་བ་དེ་ཆུང་དུ་ཕྱིན་སོང་།

དྲི་བ། གནོད་སེལ་རྒུད་སྐྱོབ་ཀྱི་བྱ་བའི་ནང་ཁྱེད་ལ་དམིགས་བསལ་དཀའ་ངལ་དེ་འདྲ་འཕྲད་སོང་ངམ། 

ལན། འབུམ་ཆུང་དགོན་པར་ས་ཡོམ་བརྒྱབ་སྟེ་ཟས་གོས་ཚང་མ་ས་འོག་ཏུ་བཅུག་ཡོད་སྟབས། ང་ཚོ་ཁུལ་ཐོག་ཏུ་ཡོང་སྐབས་ཟ་མ་གང་ཡང་འཁྱེར་རྒྱུ་ཡོད་པ་མ་རེད། ཁུལ་ཐོག་ཏུ་ང་ལ་ཉིན་གཅིག་ལ་ཐུག་སྐམ་འགྱིག་ཐུམ་གཅིག་རེ་ལས་ཟ་རྒྱུ་རག་མ་སོང་། དེ་བཞིན། མྱུར་སྐྱོབ་བྱེད་མཁན་ཁ་ཤས་ལ་ཉིན་གསུམ་ལ་ཟ་མ་ཁམ་གང་ཡང་རག་ཡོད་ས་མ་རེད། སྐབས་དེར། མི་རེ་ཟུང་གིས་ང་ཚོར་ཟ་རྒྱུ་མེད་པར་འདི་ལྟར་སོང་ན། གཞན་ལ་རོགས་རམ་བྱ་རྒྱུ་ཕར་ཞོག ཐ་ན་རང་ཉིད་ཀྱང་བཀྲེས་ལྟོགས་ཀྱིས་མནར་ནས་ཤི་རྒྱུ་རེད་ཅེས་བཤད་མཁན་བྱུང་། སྐད་ཆ་དེ་ཚོ་བཤད་སྐབས་མྱུར་སྐྱོབ་བྱེད་མཁན་ཚོ་ཡང་སྙིང་རྗེ་ཡུལ་ཞིག་ཏུ་གྱུར་འདུག དེ་མིན། ང་ཚོར་སྡོད་གནས་ཀྱི་ཐོག་དཀའ་ངལ་ཆེན་པོ་འཕྲད་མ་སོང་། ང་ཚུད་པའི་འབུམ་ཆུང་དགོན་པའི་གྲྭ་བ་ཁག་ཅིག་དུས་ཡུན་ཟླ་བ་ ༣ ཙམ་རིང་། ཡུལ་ཤུལ་ཁུལ་དུ་བསྡད་དེ་གནོད་ཐེབས་མང་ཚོགས་ལ་རོགས་རམ་བྱས་པ་ཡིན། རྒྱ་གཞུང་གིས་ཁུལ་ཐོག་ནས་མིན་པའི་གྲྭ་བ་ཚོ་ཕྱིར་ལོག་དགོས་པ་རེད། མང་ཚོགས་ལ་རོགས་རམ་བྱེད་མཁན་སྲིད་གཞུང་ཡོད་པ་རེད། ཁྱོད་ཚོ་སྡོད་དགོས་དོན་ཡོད་པ་མ་རེད་ལབ་སྟེ་ཕྱིར་བཏང་བ་རེད། ས་གནས་གཞན་ནས་རོགས་རམ་དང་ཟ་མ་སྐྱེལ་ཡོང་མཁན་ཚོའང་ཡུལ་ཤུལ་དུ་ཡོང་མཚམས་བཀག་པ་རེད། མྱོར་སྐྱོབ་བྱེད་མཁན་ཚོ་སྡོད་མ་བཅུག་པར་ཕྱིར་ལོག་སྐབས་སེམས་གཏིང་ནས་བོད་མི་རིགས་རྡོག་རྩ་གཅིག་སྒྲིལ་ཡིན་པ་དང་། ལྷག་པར་དུ། ཐེངས་འདིར་དཀའ་ལས་རྒྱག་མཁན་ནི་བོད་ཀྱི་དགེ་འདུན་པ་ཡིན་པས། ཁོང་ཚོ་བཀའ་དྲིན་ཆེན་པོ་རེད་སྙམ་པའི་ཚོར་བ་ཤུགས་ཆེར་སྐྱེས་བྱུང་།

དྲི་བ། མི་ལོ་གཉིས་ཀྱི་རྗེས་སུ་ཡུལ་ཤུལ་གྱི་འཛུགས་བསྐྲུན་དང་མང་ཚོགས་ཀྱི་འཚོ་བའི་གནས་སྟངས་གང་འདྲ་ཡིན་ནམ།

ལན། ས་ཡོམ་བརྒྱབ་རྗེས་ཀྱི་མང་ཚོགས་ཀྱི་ཟས་གོས་གནས་སྟངས་ཐོག་རྒྱ་གཞུང་གིས་འགྲོ་སོང་སྒོར་གཅིག་ཀྱང་བཏང་ཡོད་པ་མ་རེད། དེ་ནི་ངས་མ་བཤད་ནའང་རྒྱལ་སྤྱིའི་ཐོག་གསལ་པོར་ཤེས་ཀྱི་རེད། སྲིད་བློན་ཝུན་ཅ་པོ་ཡུལ་ཤུལ་དུ་འབྱོར་ཏེ། ང་ཚོ་ཡོད་སར་གཏམ་བཤད་སྤེལ་དུ་ཡོང་སྐབས། ཁོང་གིས་གཞོན་སྐྱེས་ཚོར་སློབ་སྦྱོང་སྤྲད་དེ། མ་འོངས་པའི་ཡུལ་ཤུལ་སྔར་ལས་འཛུགས་བསྐྲུན་བྱ་རྒྱུ་ཡིན་ཚུལ་དང་། ཁྱེད་ཚོའི་དཀའ་ངལ་ནི་ང་ཚོའི་དཀའ་ངལ་ཡིན། ཁྱེད་ཚོའི་སེམས་ཁྲལ་ནི་ང་ཚོའི་སེམས་ཁྲལ་ཡིན་ཞེས་བཤད་སོང་། སྐབས་དེར། ས་ཡོམ་གོད་ཆག་ནང་དྭ་ཕྲུག་ཏུ་གྱུར་མཁན་ཚོར་བོད་ཀྱི་བླ་མ་དགེ་བཤེས་དང་བོད་རིགས་ཚོང་པ་ཁག་གིས་བདག་པོ་རྒྱག་རྩིས་བྱས་ཡོད་ཀྱང་། རྒྱ་གཞུང་གིས་དེ་ལྟར་བྱས་ན་རྒྱལ་ཁབ་ཀྱི་ཁྲིམས་དང་འགལ་ཡོད་པ་རེད་ལབ་སྟེ་བཀག་འགོག་བྱས་པ་རེད། ཁོང་ཚོས་དྭ་ཕྲུག་ཚོར་དབུས་གཞུང་གིས་ལྟ་རྟོག་བྱས་ཏེ། རྒྱལ་ནང་དུ་སློབ་སྦྱོང་ལ་གཏོང་རྒྱུ་ཡིན་ཞེས་བརྗོད་དེ་རྒྱལ་ནང་དུ་བཏང་བ་རེད། ཡིན་ནའང་། སྐབས་དེར། ང་ལ་ཕྲུ་གུ་ཚོ་ཕ་ཡུལ་དང་ཁ་བྲལ་ཏེ་རང་གི་སྐད་ཡིག་དང་རིག་གཞུང་སྦྱང་མ་ཐུབ་ན། མ་འོངས་པར་དཀའ་ངལ་འཕྲད་ཀྱི་རེད་སྙམ་པའི་སེམས་ཁྲལ་ཞིག་བྱུང་སོང་། སློབ་མ་ཁ་ཤས་རྒྱལ་ནང་ནས་ཕྱིར་ཕ་ཡུལ་དུ་གུང་གསེང་ལ་ཡོང་སྐབས། ཁོང་ཚོར་སེམས་སྐྱོ་བའི་སྐད་ཆ་འདྲ་མིན་བཤད་ཀྱི་འདུག་ལ། ཁག་ཅིག་གིས་བཤད་ན། རྒྱ་རིགས་དགེ་རྒན་ཚོས་སློབ་ཕྲུག་ཚོར་ཏཱ་ལའི་བླ་མ་ཡག་པོ་མེད་ཚུལ་དང་ཁོང་ཡག་པོ་ཡོད་ན་ཁྱེད་ཚོར་བལྟ་རུ་མི་ཡོང་དོན་ཅི་ཡིན་སྐོར་གྱི་བསླབ་བྱ་རྫུན་མ་སོགས་བརྒྱབ་ཡོད་ས་རེད། 

དྲི་བ། ད་ལྟ་སྐྱེ་རྒུ་མདོའི་བོད་རིགས་མང་ཚོགས་ལ་སྡོད་ཁང་རག་ཐུབ་ཀྱི་ཡོད་དམ།

ལན། མང་ཚོགས་ཀྱི་ཁང་པའི་གནས་སྟངས་ལ་ཆ་བཞག་ན། དཔེར་ན། མི་ཚང་ཞིག་ལ་དང་ཐོག་རྒྱ་སྒོར་ཁྲི་བརྒྱ་ཙམ་གྱི་མ་གནས་ཡོད་པའི་ས་ཆ་ཡོད་ན། ད་ལྟ་ཕྱིར་སྒོར་མོ་ཁྲི་གཅིག་གི་མ་གནས་ཀྱང་རག་གི་ཡོད་པ་མ་རེད། ད་ཆར་རྒྱ་གཞུང་གིས་ཡུལ་ཤུལ་ཁུལ་གྱི་གྲོང་མཐའ་རུ། མི་ཚང་ལྔ་བཅུ་ཙམ་མཉམ་དུ་བསྡད་ཆོག་པའི་ཁང་པ་གསར་རྒྱག་བྱེད་ཀྱིན་འདུག ཁང་པ་དེར་ཕྱི་ལོགས་སུ་བལྟས་ན་གསང་སྤྱོད་ཀྱི་བཟོ་འདྲ་བོ་འདུག ནང་དུ་འཛུལ་ན་ཁྱིམ་ཚང་གི་བཟོ་ལྟ་གང་ཡང་མི་འདུག གྲྭ་བ་གྲྭ་རྐྱང་ཞིག་ཡིན་ན་ཁང་པ་དེ་ཡི་འགྲིག་སྲིད་ཀྱང་། མི་ཚང་ཞིག་གི་ངོས་ནས་བཤད་ན། ཁང་པ་དེར་ཉལ་ཁྲི་གཉིས་ལས་ཤོང་ཐུབ་ཡོད་པ་མ་རེད། ང་ཚོས་ཁང་པ་དེ་མཐོང་ཡོང་ན་ངོ་མ་སེམས་སྐྱོ་བ་ཞིག་རེད། ས་ཆ་ཡག་སར་རྒྱ་གཞུང་གིས་གཞུང་ལམ་རྒྱག་པ་དང་ལས་ཁུངས་སོགས་བརྒྱབ་ཡོང་དུས། བོད་རིགས་མང་ཚོགས་ལ་རང་རང་གི་ས་ཆའི་རིན་གོང་དེའང་རག་གི་ཡོད་པ་མ་རེད། ཅེས་བརྗོད་བྱུང་།