༤།༡༤་རྗེས་དྲན། མུ་ཏིག

འཇིག་རུང་གི་སྐྱ་རེངས་དེ་འདས་ནས། ལོ་ངོ་གཅིག་འདས་སོང་། ས་རྡུལ་དང་གྱང་རོ་ཁྲོད་ནས་བཞུད་ཟིན་པ་ཁྱེད་ཅག དངངས་སྐྲག་དང་ཕྱིར་མིག་གི་ཀློང་ནས་བཞུད་ཟིན་པ་ཁྱེད་ཅག གནམ་འོག་གི་ལན་ཆགས་ཡོད་ཚད་འཁུར་ནས། ད་བར་གང་ན་ཡོད།
ངོ་མདངས་ཤོར་བའི་ཕ་ཡུལ་དང་། ངུ་འབོད་ཆད་མ་མྱོང་བའི་ཤུལ་ལུས་ཚོའི་ཆེད་དུ། ཁྱེད་ཅག་གི་མིག་ཟུང་བཙུམ་མ་ཐུབ་དང་། རྣམ་ཤེས་བདེ་མ་ཐུབ་པ། ངས་སུ་ཞིག་ལ་དགོངས་དག་ཞུ་དགོས། བཞུད་ཟིན་པ་ཁྱེད་ཅག་ལ། མང་པོ་མང་པོ་ཞིག་ཆད་སོང་བ་ལྟ་བུའི་སེམས་ཚོར་ཞིག་གིས། དེ་རིང་། ཕ་ཡུལ་ལ་བལྟས་ནས་ངུ་བཞིན་ཡོད།

གལ་སྲིད་རྒྱུ་འབྲས་ཟེར་བའི་བློ་མིག་ཅིག་ཡོད་ན། བཞུད་ཟིན་པ་དག་ཁྱེད་ཅག་ཡིན་དོན་ཅི། བཤིག་ཟིན་པ་དག་ཀྱང་འུ་ཅག་གི་ཁྱིམ་ཚང་ཡིན་དོན་མེད། དེ་རིང་། གནམ་རྒན་མར་ཕྱོགས་རིས་འདུག་ཟེར་དགོས་བྱུང་། དེ་རིང་འཇིག་རྟེན་འདིའི་འཁོར་ཕྱོགས་ནོར་འདུག་པར། ལེ་འདའ་ཡང་ཡང་བྱས་དགོས་བྱུང་། དངོས་གནས་ཡིན། དེ་ལྟར་མིན་ན། གློག་གཟིམ་པ་བཞིན་ཡོད་ཚད་མེད་སོང་ན་ཅིས་མ་ཆོག
ད་བར་ཕ་ཡུལ་ན། པར་ཆས་མདུན་དུ་བཤམས་རྒྱུ་ལྟ་བུའི་ཁང་པ་འགའ་བརྒྱབ་འདུག གསར་འགྱུར་ནང་དུ་བསྒྲགས་རྒྱུ་ལྟ་བུའི་ལས་འཆར་འགའ་བཏོན་འདུག འོན་ཀྱང་། མུན་པ་ལྟ་བུའི་སེམས་ཀྱི་སྡུག་བསྔལ་འདི་ལ། སུས་ཀྱང་འོས་ཤིང་འཚམས་པའི་སྐད་ཆ་ཞིག་བཤད་མ་བྱུང་།
དེ་རིང་མཆོད་མེ་ཞིག་སྒྲོན་ནས། ཡིད་ལ་སིམ་ཡོད་པའི་ངོ་གདོང་མང་པོ་ཞིག་ལ་རྗེས་དྲན་བྱེད་ཀྱི་ཡོད། ད་ནས་བཟུང་ཕྱོགས་རིས་ལྟ་བུའི་འཇིག་སྣང་གི་སྐྱ་རེངས་དེ་འདྲ་ཞིག་མེད་པར་སྨོན། རྨི་ལམ་ལྟ་བུའི་རང་བྱུང་གི་འཇིགས་པ་ཞིག་ཅིས་ཀྱང་མེད་པར་སྨོན།
ཁ་བརྡ་ལས་དྲངས།