ན་ནིང་གི་ཉིན་མོ་འདིར།བདག་གིས་ཀྱང་ཡུལ་ཤུལ་ལ་ས་ཡོམ་བྱུང་བའི་སྐད་ངན་དེ་ཁ་པར་བརྒྱུད་ནས་གོ་ཐོས་བྱུང་།བདག་ལ་ཡུལ་ཤུལ་གྱི་གྲོགས་པོ་ཁ་ཤས་ཡོད་པ་མ་གཏོགས་ཡུལ་ཤུལ་གྱི་རི་ཆུ་ཐང་གསུམ་གང་ལའང་ཆ་རྒྱུས་གཏན་ནས་མེད།དེ་བས་བདག་གིས་ཡིག་འཁྱོག་འགའི་ཕྲེང་བ་བསྟར་ནས་ཁ་ཡག་ལྟ་བུའི་ལྷག་མ་ལྟ་བུའི་རྩོམ་ཡིག་ཅིག་འབྲི་ཁུལ་བྱས་ཏེ་མྱ་ངན་ཆེ་ཚུལ་དང་སྡུག་ཡུས་དྲགས་ཚུལ་ལབ་ན་ཤོད་ཅིག་ཡིན་པ་སུ་ལའང་གསང་དོན་མེད།ཡིན་ནའང་ཡུལ་ཤུལ་ནི་རང་དང་སྐྱེ་ཁུངས་རུས་རྒྱུད་གཅིག་པའི་སྤུན་ཟླ་ཚོའི་ཕ་ཡུལ་ཡིན་པ་དྲན་ན་སེམས་གསོ་འདི་ལས་ལྷག་པའི་ལེགས་སྐྱེས་གང་ཡང་རྙེད་མ་སོང་།དོན་གྱིས་བཤད་ན་འདི་ནི་ཕྱོགས་རིས་ཤིག་སྟེ།ས་ཡོམ་རྒྱལ་ཁབ་དང་གོ་ལ་ཧྲིལ་བོའི་མེ་རི་ཡི་རྟེན་མཛོད་ཁང་དུ་གྲགས་པའི་འཇར་པན་ལ་འདི་ལས་ཀྱང་དྲགས་པའི་ས་ཡོམ་གྱི་ཁར་མཚོ་འཁྱོམ་བྱུང་ནའང་གྲག་མེད་འགུལ་མེད་དུ་སྡོད་ཕོད་པའི་ངས་མ་ཎི་ཚར་གཅིག་ཀྱང་འདོན་ལོང་མེད་པར་ལུས་པའང་སུ་ལ་གསང་དོན་ཡོད་ཨང་།
དེ་བས་རྩོམ་ཡིག་འདི་ནི་དུངས་ཞེན་གྱིས་བསྐུལ་བའི་ཕྱོགས་ཞེན་གྱིས་བསླངས་པའི་སེམས་འདུན་གྱིས་དེད་པའི་སེམས་གསོ་ཁོ་ན་ཞིག་ཡིན་ཏེ།བདག་གིས་ཡུལ་ཤུལ་གྱི་ནང་མི་སྤུན་ཟླ་རྣམས་ལ་ཁ་ཁོག་མེད་པར་འཚམས་འདྲི་ཞུས་པ་ཡིན་ལ།ཡུལ་ཤུལ་ས་ཡོམ་ཁྲོད་འདས་པའི་ཞིང་གཤེགས་པ་རྣམས་ཀྱིས་ཡང་བསྐྱར་བོད་ཁ་བ་ཅན་ནས་མི་ལུས་བླངས་ཤིང་ཚེ་སྲོག་རྙེད་པའི་སྨོན་འདུན་ཡང་ཡང་ཞུས་པ་ཡིན།དངོས་ནས་བདག་གིས་འདི་ལས་ལྷག་པའི་སེམས་འདུན་ཅི་ཞིག་སྟོན་ཨང་།འཕྱིས་དྲགས་པའི་སེམས་འདུན་འདི་ལས་བདག་གིས་ཀྱང་ཅི་ཞིག་བྱ་ཨང་། ཀློག་པོ་ཁྱོད་ལའང་འདི་ལས་ལྷག་པའི་རེ་སྨོན་ཅི་ཞིག་བདོག་ནུས་ཨང་།
ད་ནི་བདག་གིས་རང་ཉིད་བོད་ཕྲུག་ཅིག་ཡིན་པའི་ངོས་ནས་ཡུལ་ཤུལ་ས་ཡོམ་ཁྲོད་དུ་དཀའ་ལས་སྐུ་ཚེགས་མྱངས་པའི་ཕྱོགས་བཞི་མཚམས་བརྒྱད་ཀྱི་སྲོག་དང་རྒྱུ་རྣམས་ཕངས་སེམས་ཅི་ཡང་མེད་པར་གཏོང་མཁན་གྱི་མི་རིགས་སོ་སོའི་སྙིང་རྗེ་ཅན་དང་ལྷག་བསམ་ཅན་རྣམས་ལ་བཀའ་དྲིན་ཞུ་བར་བྱ་སྟེ།
བདག་གིས་གཟན་ཤམ་དམར་བོ་གྱོན་པའི་རབ་བྱུང་བ་དམག་གི་ཆ་ལུགས་སྤྲས་མཁན་རྣམས་ཀྱི་བྲེལ་སྟབས་ཀྱི་གཟུགས་བརྙན་རེ་རེ་བརྗེད་དུ་མེད།
བདག་གིས་ལྩགས་ཆས་ཀྱི་འཕྲུལ་ལ་བརྟེན་ནས་མི་སྲོག་སྐྱོབ་མཁན་གྱི་དང་བླངས་པ་དང་དམག་མི་རྣམས་ཀྱི་ཡིད་ཆེས་ཀྱི་ངོ་གདོང་རེ་རེ་བརྗེད་དུ་མེད།
བདག་གིས་སྦྱིན་གཏོང་གི་ལག་ཟུང་ཡངས་པའི་ཕྱོགས་བཞི་མཚམས་བརྒྱད་ཀྱི་སྐྱེ་བོ་རྣམས་ཀྱི་དྲོད་ཁོལ་གྱིས་ཕྱུག་པའི་སེམས་གསོ་བརྗེད་དུ་མེད།
བདག་གིས་ཁབ་གསོག་འབིགས་གསོག་གིས་འཛོམས་པའི་རྒྱུ་དངོས་ཅི་རིགས་སྐྱེ་རྒུ་ལ་ཕུལ་མཁན་གྱི་ཡུལ་མི་སྤུན་ཟླ་རྣམས་ཀྱི་རིགས་གཅེས་མཐུན་སྒྲིལ་གྱི་འབོད་སྐུལ་བརྗེད་དུ་མེད།
བདག་གི་སྙིང་ཉེ་བའི་ཡུལ་ཤུལ་ཡ།ནམ་ཞིག་ཁྱོད་ཀྱི་མཛེས་སྡུག་གི་ལང་ཚོ་སླར་ཡང་སོས་པར་གྱུར་ན་བདག་ལ་དེ་ལས་ལྷག་པའི་བདེ་སྐྱིད་ཅིག་གཞར་ཡང་མེད་པར་འགྱུར་རོ། །
2011ལོའི་ཟླ4ཚེས14ཉིན་ཆེད་དུ་བྲིས།
No comments:
Post a Comment