ཤུལ་ལུས་པའི་འགན་འཁྲི། ལྡན་མ། ཐུབ་བསྟན་ཟླ་བ། འབྲས་བློ་གླིང་།

ཐོག་བརྩེགས་མཐོ་པོ་རི་བོར་མཉམ་ཞིང་བཀོད་ལེགས་མཛེས་པའི་ཁང་བཟང་དང་།།
སྐྱིད་འདོད་རེ་བ་སྟོང་གིས་ཁེངས་ཏེ་ཉིན་སྔོན་ལས་འཕྲོར་འཇུག་པ་ན།།
འབྱུང་བཞི་འཁྲུགས་པའི་གཡོ་འགུལ་ཞིག་གིས་ཐམས་ཅད་ཅིག་ཅར་བཅོམ་པའི་ཚེ།།
མི་འསུན་མྱ་ངམ་གླིང་འདིས་བྱིན་པའི་ཡིད་ཀྱི་གདུང་བ་དཔེ་ལས་འགོང་།།

རྐྱེན་ངན་གོད་ཆགས་སྟོང་གིས་ནོད་ཀྱང་སྙིང་སྟོབས་ཞུམ་ནས་མི་སྡོད་པར།།
ལ་རྒྱའི་མགོ་བོ་གྱེན་དུ་བཏེགས་དང་ཕ་བཟང་བཙན་པོའི་གདོང་གི་རྒྱུད།།
གོ་ལ་རྡུམ་པོ་གནས་སུ་བྱས་པའི་རྐང་གཉིས་པ་ཡི་སྐྱེ་བོ་ཡིས།།
བསྔགས་པའི་རིག་གཞུང་དགོས་འདོད་ནོར་བུ་གཅེས་པའི་ནོར་གྱི་བདག་པོ་ཡིན།།

གཅེས་ནོར་འདི་ལ་གོད་ཆགས་མེད་པར་བུ་ཚའི་གཡང་དུ་མ་ཞོག་ན།།
བཞག་པ་མེད་པའི་ཕ་ཁུ་འདས་པའི་ཤུལ་ལུས་སྐྱོང་མེད་དྭ་ཕྲུག་ཚོ།།
ཕུགས་ནོར་མེད་པའི་དབུལ་པོ་ཁོ་ནས་འཚོ་བར་རོལ་བའི་སྤྲང་པོ་ཞིག།།
བཙན་པོ་དམ་པའི་ཁྱིམ་གཞིས་མ་ཟིན་ངེས་པ་མེད་པའི་འཁྱམ་པོ་ཞིག།།

སྙིང་རྩ་མ་རུལ་བསམ་གཞིག་མཁས་ན་སྲུང་བའི་བྱ་ར་མ་ཉམས་པ།།
གཡོ་རྒྱུ་ཅན་གྱི་ཇག་རྐུན་མཁས་པས་རྐུ་བའི་བྱ་བ་མ་གྲུབ་པར།།
མེས་པོས་བཞག་པའི་ནོམ་ཅན་དངོས་པོ་བུ་ཚའི་གཡང་དུ་འཁྱིལ་བ་ལ།།
ཁུར་དུ་བབས་པའི་ལས་འགན་ལྕི་མོ་ཕྲག་ཏུ་ལྷུང་བ་མ་ཡིན་ནམ།།