རྟ་ནག་སྐལ་བཟང་ལུང་རིགས། བལ་ཡུལ།

རྒྱལ་བོའི་ཆད་པའི་ལས་ཀྱི་འཇིགས་པ་དང༌། ཕ་རོལ་གྱི་དམག་ཚོགས་ཀྱི་འཇིགས་པ་དང༌། མཚོན་གྱི་འཇིགས་པ་དང༌། དུས་མ་ཡིན་པར་འཆི་བའི་འཇིགས་པ་དང༌། ས་གཡོ་བའི་འཇིགས་པ་སོགས་གནམ་གྱིས་ཀྱང་ཁྱག་དཀའ་བའི་མྱ་ངན་དང་འཇིགས་པ་འདི་འདྲ་བ་མགོ་ཐོག་ཏུ་ལྗིད་ཏིག་གེར་ལྷུང་བ་དང་དུས་མཚུངས་སུ་སེམས་པ་མྱ་ངན་གྱིས་རབ་ཏུ་འགུལ། ཤིན་ཏུ་འགུལ། རབ་ཏུ་ཤིན་ཏུ་ཀུན་ཏུ་འགུལ་ནས་ལུས་སྡུག་བསྔལ་གྱི་ནོན་པར་གྱུར་ནས་སེམས་བསམ་པའི་གཏིང་ནས་མཆི་མ་ཟད་མི་ཤེས་པ་འཁྲུགས་པར་གྱུར་ཏོ།།

བུ་སྡུག་པ་གཅིག་བུ་དུས་མ་ཡིན་པར་འཆི་བའི་དུས་བྱས་ཤིང་ཚེ་ཐུང་བར་གྱུར་པའི་ཕ་དང་མ་རྣམས་ཡིད་མྱ་ངན་གྱིས་རབ་ཏུ་ནོན་ནས་རང་ཉིད་ཀྱི་སྲོག་ལའང་རྒོལ་བར་རྩོམ་ཞིང༌། སྙིང་ཉེ་བའི་བུ་སྡུག་པ་དག་གི་རུས་པ་དེ་དག ཤ་དང་། ཁྲག་དང༌། རྒྱུས་པ་རྣམས་ལྕགས་ཀྱིས་གཅུར། རྡོ་ཡིས་གླེབས། སྐྲ་ཡངཕྱོགས་དང་ཕྱོགས་མཚམས་སུ་འཐོར་བ་མཐོང་ནས་ཤིང་རླུང་གིས་བཏབ་པ་བཞིན་

འགྱེལ་ཏོ།།

ད་དུང་སྐྲ་ཞིག་ཅིང་ལག་པ་གཉིས་ཀྱིས་བྲང་ལ་བརྡུངས་ཏེ། ཉ་ཐང་ལ་ཕྱུང་བ་བཞིན་སའི་སའི་སྟེང་ན་འགྲེ་ལྡོག་ཅིང་མ་ཧེའི་བེའུ་སྟོར་བ་དང༌། རྔ་མོ་རྔེའུ་སྟོར་བ། ངང་བས་ངང་ཕྲུག་སྟོར་བ་བཞིན་དུ་སྙིང་རྗེ་རྗེའི་སྐད་དུ་ངུའོ།།

བརྩེ་བའི་ཕ་དང་མར་བྲལ་བའི་དྭ་ཕྲུག་ཉམ་ང་བ་དག་ཀྱང་དེ་དེ་བཞིནདུ་མྱ་ངན་གྱིས་ཉམ་ཐག་ཅིང་མིག་མཆི་མས་གང་སྟེ། རྐན་དང༌། མཆུ་དང༌། ཁ་དང་། སོ་བསྐམས་ནས་ཅི་ཡང་སྨྲ་མི་བཏུབ་པ་དང་དུས་མཚུངས་སུ་སྐྱེ་བོའི་ཚོགས་ཆེན་པོ་དང་ལྷན་དུ་ས་ཆེན་གྱི་འཇིགས་པ་དང་བསྡེབས་ནས་ཚེ་འཕོས་པ་དག་གི་བྱེ་ཞིང་བྲལ་བའི་རུས་པ། རབ་ཏུ་གྱུར་པའི་ཟུངས་ཁྲག ཕྱོགས་དང་ཕྱོགས་མཚམསསུ་འཐོར་བའི་སྐྲ་ལོ་ཀུན་པོ་ཞུགས་ཆེན་པོའི་ཞལ་དུ་བསྟབས་ཤིང༌།

གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་རྣམས་ཀྱི་སྐྱེ་བོ་འབུམ་ཕྲག་འབུམ་ཕྲག་དུ་མས་ངུ་སྐད་གནམ་ས་འགེངས་པ་ལྟ་བུ། ཆོ་ངེ་བྲག་རི་བསྙིལ་བ་འདྲ་བ། མིག་ཆུ་རྒྱ་མཚོ་འཁྲུགས་པ་ལྟ་བུ། སྨྲ་ཤེས་དོན་གོ་བའི་མི་ཙམ་དུ་མ་ཟད། རྟ་དང་གླང་པོ་ཆེ་ལ་སོགས་པ་སྲོག་ལ་ཐོགས་པའི་འགྲོ་བ་ཡོད་དོ་ཅོག་ཡིད་མི་སྡུག་པ། སྐྱི་གཡའ་བ། ཉམ་ཐག་པ། སྙིང་རྗེའི་ཡུལ་དུ་བྱ་འོས་པའི་གནས་སུ་གྱར་བའི་དུས་འདི་དང་འདི་ལྟ་བུ་ལ། གློ་བུར་བས་དྲི་མས་བསྒྲིབས་པའི་མི་སེམས་ཀྱི་བརྩེ་བས་ཀུན་ནས་བསླངས་ཏེ་སྟོབས་ཀྱིསདྲེགས་པ་དག་གིས་རྒྱབ་ནས་སྐྱོར། འབྱོར་བས་ཁེངས་པ་རྣམས་ཀྱིས་ལག་ནས་འཇུས། ཅི་ཡང་མེད་ཅིང་གང་ཡང་དབེན་པ་བདག་དང་བདག་འདྲ་བ་དག་གིས་ཀྱང་མྱ་ངན་གྱིས་ཡིད་ཤིན་ཏུ་ནས་ནོན་པ་དག་དང་སྡུག་བསྔལ་མཉམ་དུ་མྱོང་བར་རེ་ནས་མྱ་ངན་གྱིས་འབོད། སེམས་ཀྱིས་གླན། ངག་གིས་གླེང་སྟེ་འཇིག་རྟེན་གྱི་སྡུག་བསྔལ་སྐེམས་པ། འཇིགས་པ་ཐམས་ཅད་ཀྱི་རྒྱུན་གཅོད་པ། གནོད་པ་རྣམ་པ་སྣ་ཚོགས་ཞི་བར་བྱ་བ་དང༌། ཤི་བོའི་རྗེས་ཀྱི་གསོན་པོ་དག་གི་ཡིད་མྱ་ངན་དང་སྡུག་བསྔལ་གྱིས་རབ་ཏུ་འཁྲུགས་པར་གྱུར་པ་དག་རབ་ཏུ་ཞི་བར་བྱ་བ་དང༌། ཤིན་ཏུ་ཉུང་བར་བྱ་བ་ལ་ཅུང་ཟད་ཙམ་ཕན་ན་སྙམ་པ་དང༌། རང་ཉིད་ཀྱི་ཕ་དང་མ་དང༌། ཉེ་མི་དག་དང་བྲལ་བ་ནང་བཞིན་དང་ཇི་ལྟ་བུའི་ཚོར་བ་དྲགཔོས་རབ་ཏུ་བསྐུལ་བས།ནུས་ཚད་འཇོན་ཚད་རྩལ་དུ་སྤྲུགས་པའི་ཁུལ་དུ་བགྱིས་ཏེ་༤་༡༤མྱ་ངན་ལ་ཞུ་བའི་དེབ་གཟུགས་འདི་པར་དུ་གདབ་པའི་ཉེར་བསྡོགས་ལ་ཞུགས་པ་ཡིན། གོ་རིམ་དང་འཆར་གཞི་འདི་དུས་ཚོད་ཐུང་ཐུང་ཞིག་ལ་བཟོས་ཤིང་དུས་ཚོད་ཐུང་ཐུང་ཞིག་ལ་མཇུག་བསྡུས་པ་ཡིན་གཤིས་ཟ་ཟུར་དང་དངོས་ཤུགས་གང་ན་ནོངས་པ་མང་དུ་བདོག་པ་ཡོད་ལས་ཆེ་བས་དེ་ལུགས་ཐུགས་ཀྱིས་བཟོད་པར་མཛད་དུ་གསོལ།

སྤྱིར་ངེད་རྩོམ་སྒྲིག་པ་ཟུང་གིས་མྱ་ངན་བྲིས་རྩོམ་དག་རྩེར་འདེམས་ཀྱིས་དེབ་གཟུགས་སུ་སྒྲུབ་པའི་ལས་རིམ་ཡོངས་སུ་རྣགརྐྱ་ནས་པར་འདེབས་ཁངདུ་བསྐྱལ་ལ་ཉེ་བའི་སྐབས་ཤིག་ལ། འཕགས་ཡུལ་ལྷོ་ཕྱོགས་སུ་ཡང༵མགོབོ་བཏུད་དེ་མྱ་ངན་ཞུ་བཀཞེས་པའི་མྱ་ངན་ཆེད་ཞུའི་དེབ་ཅིག་བསྐྲུན་ཡོད་པ་དྲ་ཚིགས་གང་རུང་ལས་མཐོང་ཞིང༌། དེའི་ཁྲོད་ཀྱི་རྩོམ་ཡིག་ཕལ་མོ་ཆེ་གླེགས་བམ་འདི་དང་དབྱངས་གཅིག་མགྲིན་གཅིག་ཚིག་གཅིག་ཏུ་གྱུར་སོང་གཤིས། ཡང་བསྐྱར་མྱ་ངན་ཆེད་དེབ་འདིའི་སྟེང་འོག་ཕྱི་ནང་གསང་གསུམ་བསྐྱར་སྒྲིག་བྱ་དགོས་བྱུངསོང་བས་འགྲེམས་སྤེལ་གྱི་དུས་ཚོད་ཀྱང་མྱ་ངན་གྱི་བདུན་ཕྲག་ལྔ་བ་ལས་ཕྱིར་བསྣུར་གྱིས་བདུན་ཕྲག་བདུན་པ་ལ་བསྐྱལ་དགོས་བྱུང་སོང༌། དེ་བས། མྱ་ངན་གྱིས་ཡིད་རབ་ཏུ་ནོན་པ་དག་ལ་དུས་ཐོག་ཆར་བ་རུ་འགྱུར་མ་ཐུབ་པ་ལའང་བཟོད་པར་གསོལ་ལོ་ཞེས་ཞུ་བའོ།། བསྡུས་དེབ་འདིར་བཀོད་པའི་མྱ་ངན་གྱི་ཡི་གེ་མང་བོ་མང་བོ་ཞིག་བོད་གཞི་བྱེས་ཀྱི་དྲ་ཚིགས་དག་ལས་ཐད་ཀར་ངོ་བཤུས་བཏབ་པ་ཡིན། དུས་ཚོད་ཐུང་དྲགས་པ་དང༌། མྱ་ངན་སྡུག་བསྔལ་གྱིས་ནོན་ཐལ་བ། སེམས་པ་རབ་ཏུ་འཁྲུགས་པར་གྱུར་པ་བཅས་ཀྱི་དབང་གིས་ཡི་གེ་འབྲི་བ་བོ་དག་ལ་བརྩམས་ཆོས་པར་དུ་བརྒྱབ་ཆོག་མིན་གྱི་དགོངས་པ་ཞུས་ཏེ་འགྲོ་ལུགས་ཚུལ་ལྡན་བསྒྲུབ་ཁོམ་མ་བྱུང་བ་དེ་ཡང་ཐུགས་ཀྱིས་བཟོད་པར་མཛད་དུ་གསོལ།

མཇུག་ཏུ། མྱ་ངན་ཆེད་ཞུའི་དེབ་འདི་གཏགས་སྒྲིག་ཁྲོད་དུ་གྲུབ་ཆེན་རིན་པོ་ཆེའི་ཡང་སྲིད་གང་ཉིད་ཀྱིས་གློག་འཁྱེར་གློག་ཀླད་ཀྱི་རྐྱེན་སྦྱར་བ་ལ་ཤིན་ཏུ་ནས་ཐུགས་རྗེ་ཆེ་ཞུ་བཞིན་ཡོད།

ཞེས་རྩོམ་སྒྲིག་པ་ཟུང་གིས།
༢༠༡༠། ༤། ༢༥། ཉིན་བལ་ཡུལ་གྱི་མཆོད་རྟེན་ཆེན་མོ་དེའི་འགྲམ་དུ་སྦྱར་བའོ།།