སྒ་སྐྱེ་རྒུ་མདོའམ་ཡང་ན་མདོ་སྟོད་སྒ་པའི་གླིང་དུ་ས་གཡོ་བའི་འཇིག་པ་བྱུང་ནས་མི་ལོ་ཧྲིལ་པོ་གཅིག་འཁོར་བའི་དེ་རིང་། བོད་གཞིས་བྱེས་གཉིས་སུ་དངོས་དང་བཅོས་མ་དུ་མའི་སྒོ་ནས་རྗེས་དྲན་དང་། མྱ་ངན་བྱེད་བཞིན་པ་རེད། དེ་བཞིན་དུ་དྷ་རམ་ས་ལ་རུ་༼ཡུལ་ཤུལ་༤་༡༤་ས་ཡོམ་གདུང་སེལ་ཚོགས་ཆུང་༽གིས་ཀྱང་བཞུགས་སྒར་དྷ་རམ་ས་ལ་རུ་མྱ་ངན་རྗེས་དྲན་ཞིག་འཚོགས་ཡོད་འདུག དེའི་སྐབས་སུ་བོད་དུ་ཕྱི་སྡོད་བོད་མའི་ཞལ་འདེབས་རྣམས་བོད་ཡུལ་དུ་ཇི་ལྟར་བསྐྱལ་བའི་སྐོར་ནས་འཕྲོས་པའི་དྲི་བ་དྲིས་ལན་འཁྲུག་པོ་འགའ་ཞིག་དང་བཅས་ཚོགས་འདུས་གྲོལ་ཡོད་པ་གོ་ཐོས་ཙམ་ལས་གནས་ཚུལ་གསལ་པོ་མ་ཤེས།
དེ་བཞིན་དུ་ཡུལ་ཤུལ་བ་འཛམ་གླིང་གང་ན་སུ་འཁོད་ཡོངས་ཀྱི་དེ་རིང་གི་ཉི་མ་འདི་ལ་མཆོད་འབུལ་དང་། རྗེས་དྲན་བྱེད་བཞིན་ཡོད་འདུག་ལ། དེ་ལས་ཁ་གསལ་བ་ཞིག་ནི་འབྲས་སྤུངས་ལྡན་མ་ཁམས་ཚན་གྱི་བླ་སྤྲུལ་དགེ་བཤེས་དང་། གྲྭ་མང་དང་བཅས་པ་འདུ་འཛོམས་ཀྱིས་ཐོག་མར་ས་ཡོམ་དེ་ཡིས་གནོད་འཚེ་ཕོག་པའི་ཡོངས་ཀྱི་ཆེད་དུ་མྱ་ངན་མཚོན་བྱེད་ངག་བཅད་དང་། དེ་ནས་སྣང་གསལ་ཞལ་ཁ་ཕྱེ་བ་སོགས་བསྔོ་སྨོན་གཟབ་རྒྱས་དང་། དེ་རྗེས་ས་ཡོམ་ཇི་ལྟར་བྱུང་ཚུལ་གྱི་སྔ་ཕྱི་བར་གསུམ་དང་། དེ་རྗེས་ཤུལ་ལུས་རྣམས་ཀྱི་ས་ཞིང་གནས་ཁང་སོགས་ད་ལྟའི་དཀའ་ཁག་དང་། མ་འོངས་པ་ཇི་དགེ་སོགས་ལས་འཕྲོས་ཏེ་དྲི་བ་དྲིས་ལན་རྒྱུན་རིང་བྱས་པ་དང་། མཚན་ཕྱེད་བར་དུ་བཀའ་སྡེ་སྣོད་གསུམ་འུར་འདོན་བྱས་པ་སོགས་མྱ་ངན་གྱི་ཉི་མ་ནག་པོ་དེ་ཆོས་ཕྱོགས་རྣམ་དཀར་དགེ་བས་བསྐྱལ་ཡོད་པ་རེད། །
No comments:
Post a Comment