འབྱུང་བཞི་གོ་ལྡོག་མ། ལྡན་མ་ཐུབ་བསྟན་ཕུན་ཚོགས། འབྲས་བློ་གླིང་།

སྒྱུ་རྩལ་སྟོང་གིས་བསྐྲུན་པའི་ཁང་བཟང་དང་།།
ངལ་བ་བརྒྱ་ཕྲག་བརྟེན་པའི་རིན་ཆེན་རྫས།།
ལོ་རྒྱུས་རང་བཞིན་ལྡན་པའི་གཏེར་དངོས་སོགས།།
འབྱུང་བཞི་འཁྲུག་པའི་ས་ཡི་འོག་ཏུ་ནུབ།།

དེང་རབས་གློག་འཕྲིན་སྐུད་པ་ཐག་སེ་ཆད།།
གནའ་བོའི་སྲོལ་རྒྱུན་བཟང་པོ་ཐལ་བས་བསྒྲིབས།།
ཤུལ་ལུས་དེ་ན་རོ་དང་སྨྲེ་ངག་ཁེངས།།
མགོན་མེད་གྲོང་ན་སུ་ཞིག་སྐྱོབ་པར་འོང་།།

སྙན་ངག་པ་ཡི་སྨྱུག་རྩེའི་མིག་ཆུ་འདྲེས།།
ཁྱིམ་གྱི་རྒན་པོའི་ངུ་ངག་རླུང་ལ་བསྲིང་།།
ཆོལ་གསུམ་སྤུན་ཟླ་སེམས་པ་མུན་པས་ནོན།།
ང་ཡི་སེམས་པ་ཆུ་གཏིང་རྡོ་ལས་གྲང་།།

ཡུལ་གྱི་བཀོད་པ་རྟོག་ངོར་འཆར་བའི་བརྙན།།
སུས་ཀྱང་ཕྱི་བ་མི་ནུས་བརྟན་པར་ཟུགས།།
ལས་དབང་བཙན་པོས་ས་མཐར་ཕུད་པའི་བུ།།
རྒྱང་རིང་ཡུལ་ནས་མིག་ཆུ་དབང་མེད་ཤོར།། །།