ངའི་ཕ་ཡུལ་མིག་ཆུའི་ཁྲོད་དུ་ལུས། ལྡན་མ་བྱམས་པ་འབྱུང་གནས། འབྲས་བློ་གླིང་།

གསེར་རགས་ཟངས་གཏེར་བཙན་པོ་དང་གིས་དམར་བོའི་གཞུང་ལ་སྐྱེལ་འདྲེན་བྱས།
རང་བྱུང་ཁོར་ཡུག་བཅུད་ཀྱིས་སྟོང་བས་ཡི་དམ་ཁྲོས་པའི་ཞལ་ཁྱིམ་ནས།།
འཇིགས་རུང་ས་རྡོ་ཁད་ཀྱིས་འཐོར་བའི་ཐལ་རྡུལ་རྦ་རླབས་དགུང་ལ་བསྙེགས།།
སྐྱེ་དགུའི་བོད་ཀྱི་ཚེ་སྲོག་འབུམ་ཕྲག་བ་སྲིད་ཀློང་དུ་དབང་མེད་བདས།།

ཀྱེ་མ་བུ་ངའི་ཕ་ཡུལ་སྐྱེ་དགུའི་དཔྱོད་ལྡན་འབུམ་གྱི་རྣམ་ཤེས་ཡལ།།
གནའ་བོའི་རིག་གཞུང་གསེར་གྱི་བྱེ་མར་ཆོམ་རྐུན་སྟོང་གིས་ལག་པ་བསྲིངས།།
སྲིད་འབྱོར་རིག་གསུམ་སྙན་པའི་དབྱ་རྔ་དལ་གྱིས་རྒོད་པའི་རྒྱུན་དེ་ཆད།།
བསམ་གྱིན་བསམ་གྱིན་དྲན་པའི་གསེབ་ན་སྡུག་གི་རྣག་ཁྲག་བར་མེད་བརྡོལ།།

མཛངས་ལྡན་ཕ་མས་ལ་རྒྱའི་ཞལ་ཁྱིམ་ཕྱི་རབས་བོད་ལ་སྟོན་དབང་བྲལ།།
ཕོ་བྲང་དམར་བོའི་ཁྱིམ་གཞིས་སྐྱོང་བི་གཞོན་ནུའི་རེ་ཐག་འདི་ནས་བཅད།།
མི་འདོད་སྡུག་གི་བཀྲེས་ལྟོགས་འཕྱུར་བའི་གཤིན་ཐང་ཡི་དྭགས་གྲོང་ཁྱེར་ན།།
ཏཱ་ལའི་བླ་མའི་ཞལ་མཇལ་རེ་སྒུག་ཡ་ང་སྲོག་གི་གཏའ་མར་ཉར།།