ཨ་རི་ནེའུ་ཡོག་གི་སྐྱེ་དགུ་མདོ་པ་རྣམས་ལ་བསྩལ་བའི་བཀའ་སློབ།

ཕྱི་ལོ་༢༠༡༠ ཟླ་ ༥ ཚེས་ ༢༠ཉིན་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཨ་རིའི་གྲོང་ཁྱེར་ནིའུ་ཡོག་ཏུ་གནས་སྡོད་སྒ་སྐྱེ་དགུ་མདོའི་བོད་མི་སྐོར་ཞིག་ལ་དམིགས་བསལ་མཇལ་ཁ་དང་བཅས་བསྩལ་པའི་བཀའ་སློབ།

ད་རེས་རྐྱེན་ངན་འདི་བྱུང་སྐབས་ང་རང་ལ་ཡང་སེམས་ཁྲལ་བྱུང་། ལྷག་དོན་འབྲོག་སའི་ཁུལ་དེ་དག་ལ་སྨན་བཅོས་ཀྱི་མཐུན་རྐྱེན་སོགས་ཁག་པོ་ཞེ་དྲག་རེད། དེ་བཞིན་འགྲིམ་འགྲུལ་སླེབས་རྒྱུ་ཡང་ཁག་པོ་ཡོད་པར་བརྟེན་དཀའ་ངལ་ཡོད་པ་རེད་བསམས་ཏེ་སྐབས་དེར་ང་རང་འགྲོ་ཐུབ་ན་བསམ་པའི་རེ་བ་བྱུང་། རེ་འདུན་བཏོན་པ་ཙམ་མ་ཟད་ངའི་ངོ་ཤེས་པའི་རྒྱ་མི་དེ་འདྲ་བརྒྱུད་འབྲེལ་བ་བྱས་པ་ཡིན། ད་ལྟ་འགྲིག་དང་མ་འགྲིག་སོགས་ཀྱི་ལན་གང་ཡང་མ་བྱུང་། རྐྱེན་ངན་བྱུང་ཚར་བ་རེད། ངས་རྟག་པར་འདི་ལྟར་བརྗོད་ཀྱིན་ཡོད། ང་ཚོ་སངས་རྒྱས་པའི་ཆོས་པ་ཞིག་གི་ངོས་ནས་བསམ་བློ་གཏོང་སྟངས་གང་འདྲ་བྱེད་དགོས་རེད་ཟེར་ན།

གལ་ཏེ་བཅོས་སུ་མེད་ན་ནི།།

དེ་ལ་མི་དགའ་བྱས་ཅི་ཕན།།

གལ་ཏེ་བཅོས་སུ་ཡོད་ན་ནི།།

དེ་ལ་མི་དགར་ཅི་ཞིག་ཡོད།།

ཅེས་པའི་སྤྱོད་འཇུག་གི་བསླབ་བྱ་འདི་ཡག་པོ་ཞེ་དྲག་འདུག

འདས་གྲོངས་སུ་ཕྱིན་པ་ཚོར་རྐྱེན་ངན་བྱུང་བ་རེད། བྱུང་ཚར་བའི་ཐོག་ལ་ཧ་ལས་པའི་སེམས་ཁྲལ་བྱས་ཀྱང་ཕན་ཐོགས་གང་ཡང་མེད། གསོན་པོ་ཚོར་སྨན་བཅོས་བྱ་རྒྱུར་ལྷོད་གཡེང་མ་སོང་བ་དང་། མ་འོངས་པར་འཛུགས་སྐྲུན་ཡག་པོ་བྱེད་དགོས། དེ་སྔོན་ཧེ་ཊི་ལ་ས་ཡོམ་གྱི་གནས་ཚུལ་བྱུང་སྐབས་མི་ཁ་ཤས་ཀྱིས་ང་ལ་སྐད་ཆ་དྲིས་བྱུང་། དེ་དུས་ངས་ཚར་བ་དེ་ཚར་བ་རེད། ཧ་ལས་པའི་ཐབས་སྐྱོ་བོ་བྱུང་བ་རེད། མ་འོངས་པར་ལུང་པ་གསར་པ་ཞིག་འཛུགས་སྐྲུན་བྱ་རྒྱུའི་ཐོག་བསམ་བློ་བཏང་སྟེ་ཤུགས་རྒྱག་དགོས་པ་རེད་ཅེས་ཁོང་ཚོར་འདི་ལྟར་བརྗོད་རྒྱུ་བྱུང་། ད་ལྟ་ང་ཚོ་བོད་པ་ཚོ་ཡང་དེ་དེ་བཞིན་རེད། གལ་ཆེ་ཤོས་དེ་སློབ་གྲྭ་བསྐྱར་གསོ་བྱ་རྒྱུ་དང་སྨན་ཁང་། དེ་བཞིན་མི་མང་གི་འཚོ་བའི་མདུན་ལམ་གསར་བ་ཞིག་བཟོ་དགོས་ཀྱི་རེད། དེ་བཞིན་ང་རང་ཚོ་ཆོས་པའི་ངོས་ནས་བཤད་པ་ཡིན་ན། ཐེངས་འདིའི་གནས་ཚུལ་དེས་རྐྱེན་ངན་ཧ་ལས་པ་ཞིག་བྱུང་བ་རེད་ལ། དགེ་མཚན་ཡང་ཁ་ཤས་བྱུང་ཡོད་པ་ལྟ་བུ་རེད། འདས་གྲོངས་སུ་ཕྱིན་པ་གཅིག་མཚུངས་ཡིན་ཡང་། ད་རེས་འདས་གྲོངས་སུ་ཕྱིན་པ་དེ་དག་ལ་འབྲེལ་ཡོད་མང་བོ་ཞིག་གིས་དམིགས་བསལ་སྨོན་ལམ་གཟུངས་སྔགས་བཏོན་པ་སོགས་བྱུང་ཡོད།

འདས་གྲོངས་སུ་ཕྱིན་པའི་མི་ཚོའི་དོན་དུ་སྐྱབས་ཞུའི་བསྔོ་རྟེན་སོགས་ཕུལ་མི་དགོས་པར་གནས་ཚུལ་འདི་ཧ་ཅང་གི་ཛ་དྲག་ཅིག་ཆགས་ཡོང་དུས་ཕྱོགས་ཚམས་སེམས་ཁུར་དང་སྨོན་ལམ་བརྒྱབ་པ་སོགས་བྱུང་ཡོད་པ་གཅིག་དང་། གཉིས་ནས་ང་ཚོ་བོད་མི་གཅིག་གྱུར་གྱི་འདུ་ཤེས་ཀྱི་ཤུགས་ཚད་དེ་ག་ཚོད་ཡོད་མེད་གསལ་བོ་ཞེ་དྲག་བྱུང་ཡོད། གནས་ཚུལ་ཛ་དྲག་བྱུང་བ་དང་གཡས་གཡོན་གྱི་དགེ་འདུན་པ་གཙོ་བོར་གྱུར་པའི་བོད་རིགས་ཚང་མས་ཁུར་མཉམ་ལེན་དང་། གདུང་ཤུགས་ཆིག་སྒྲིལ་གྱིས་འབད་བརྩོན་ཧ་ཅང་ཆེན་པོ་བྱས་ཡོད། དེས་བོད་མི་རིགས་གཅིག་གྱུར་གྱི་རྣམ་པ་གསལ་བོ་ཞེ་དྲག་ཐོན་ཡོད། རྒྱ་ནག་གི་གཙོ་འཛིན་ཚོའི་ནང་ནས་ཡིན་ ནའང་ཝན་ཅ་པའོ་སྔ་རྗེས་གཉིས་ཙམ་ས་གནས་དེར་བསླེབས་ཡོད། སེམས་ཁུར་ཞེ་དྲག་ཡོད་པའི་བཟོ་འདྲ་འདུག གཉིས་ནས་ཐེངས་འདིའི་ས་ཡོམ་གྱི་རྐྱེན་ངན་བྱུང་བའི་གློག་བརྙན་དེ་རྒྱ་ནག་རྒྱལ་ཡོངས་ལ་སྟོན་སྐབས་སྲིད་བློན་ཐེངས་གཉིས་ཙམ་ས་གནས་དེར་ཕེབས་པ་རེད། རྒྱ་ནག་ནང་གི་རྒྱ་མི་ཚོས་བསམ་བློའི་ནང་ཤ་ཚ་སླེབས་རྒྱུ་དང་། བོད་པ་ཚོར་སེམས་ཐག་ཉེ་བོ་སླེབས་པ་སོགས་ཕྲན་བུ་ཕན་ཐོགས་བྱུང་བ་ལྟ་བུ་འདུག ནམ་རྒྱུན་རྒྱ་ནག་གཞུང་འབྲེལ་གྱི་གློག་བརྙན་ནང་དུ། ཡང་ན་གྲྭ་བས་ངོ་རྒོལ་བྱས་པ་ཞིག་སྟོན་པ་དང་། ཡང་ན་ཧ་ལས་པའི་འཛུགས་སྐྲུན་བྱས་པ་ཞིག་སྟོན་པ་མ་གཏོགས་དངོས་ཡོད་གནས་ཚུལ་དེ་ཞེ་དྲག་མཐོང་རྒྱུ་མེད། ཐེངས་འདིའི་དངོས་ཡོད་གནས་ཚུལ་དེ་དག་མཐོང་རྒྱུ་ཡོད་པ་སོགས་ཀྱི་དགེ་མཚན་བྱུང་ཡོད། དེར་བརྟེན་ཁྱེད་རང་ཚོ་ཚང་མ་བློ་བདེ་བོ་གྱིས། སྨོན་ལམ་ཡག་པོ་རྒྱོབས། ཞེས་བསྩལ།