སྐྱེ་རྒུ་མདོའི་སྤུན་ཟླ་ཚོར།
མི་རྟག་རླུང་གིས་དྲག་ཏུ་སྐུལ་དུས་ས་ཆེན་སྙིང་གི་འཕར་རྩ་ལྡིང༌།།
ཆེན་པོར་རློམ་པའི་རི་བྲག་མཚོ་ཡང་དེ་ཡི་ཞབས་འོག་སྐད་ཅིག་ནུབ།།
ལྷ་ཀླུ་གཞིས་བདག་ཇི་ལྟར་མང་ཡང་རྫུ་འཕྲུལ་སྟོན་པའི་ནུས་སྟོབས་ཞན།།
འདི་ནི་རྟེན་འབྲེལ་གོ་ལུགས་ཡིན་ན་མཐུ་དང་ནུས་པའི་སྒྲོ་མ་འདོགས།།
བྱམས་དང་སྙིང་རྗེ་གླེང་ཐབས་བྲལ་བའི་ས་ནག་མཆེ་བ་བགྲད་ཡོང་དུས།།
ས་དང་གནམ་ལ་རླུང་བཞིན་རྒྱུ་བའི་ཚན་རིག་རྒོད་པོ་འདི་རྣམས་ཀྱང༌།།
རྒྱ་སྟག་ངར་མོའི་མདུན་ན་ལུས་པའི་མདང་སྐྱེས་བེའུ་ཆུང་ངུ་བཞིན།།
གནམ་ས་གཉིས་ཀྱི་གཡོས་སྦྱོར་འདི་འོག་རང་ཚུགས་ཤོར་ཚུལ་འདི་ལྟར་ལགས།།
དཔལ་དང་འབྱོར་པས་གླིང་ལྔ་འགུག་ཅེས་དུང་གི་སྒྲ་དབྱངས་རྒྱུན་མི་ཆད།།
མཐོ་དང་དམའ་ཡི་མི་ལུས་ཀུན་ལ་སྙོམས་པོར་སྤྱོད་ཅེས་འུར་གྱིས་འདོན།།
བདེན་དང་རྫུན་པའི་ཁ་ཚོན་གཅོད་པར་ཁྲིམས་ཀྱི་ར་བ་མི་དགོས་ཀྱང༌།།
མིག་དང་རྣ་ཡིས་རིག་ཚུལ་འདི་ཡིས་གནས་ལུགས་གང་ཡིན་རྗེན་པར་འཆར།།
འུར་འུར་ལྡང་བའི་སྐད་སྒྲ་འདི་ཡིས་ཉམ་ཆུང་མི་ཡི་སྙིང་རྩ་གཅོད།།
ཐལ་རྡུལ་རླབས་ཀྱི་ཟེགས་མ་འདི་འོག་རང་རིགས་སྤུན་ཟླ་གྲངས་མེད་སོང༌།།
ཁང་བརྩེགས་ཞིག་རོའི་བར་དང་གསེང་ནས་ངུ་ངག་སྐྱེན་པོ་སྒྲོག་ཐེངས་རེར།།
མིག་དང་མིག་ཆུ་གཅིག་ཏུ་མ་འདྲེས་སྙིང་ཁམས་ཅན་ཞིག་གང་ན་ཡོད།།
དུས་ཀྱི་འགྱུར་བག་སྣང་མུན་ཇི་བཞིན་གཡས་ནས་ནུབ་ཀྱང་གཡོན་དུ་འཆར།།
མི་ཡི་སྐྱིད་སྡུག་དུས་ཀྱི་འགྲོས་བཞིན་རྟག་བརྟན་ཐེར་ཟུག་གང་ན་ཡོད།།
ཤུལ་དུ་ལུས་པའི་སྤུན་ཟླ་རྣམས་ཀྱང་སྐྱོ་གནས་འདི་ལས་མྱུར་གྲོལ་ཆེད།།
གང་ན་འདུག་པའི་རང་རིགས་རྣམས་ཀྱིས་གློ་སྙིང་དྲོན་མོ་ཁྱེད་ལ་གཏོད།།
ཁྲག་དང་མིག་ཆུ་ལྷན་དུ་བཞུར་གྱིན་ལྷ་དང་བླ་མར་གསོལ་འདེབས་ཀྱིན།།
མེ་དང་དུད་པ་དགུང་དུ་འཕྱུར་གྱིན་ཆོས་ལུགས་ཆོ་གའི་གདུང་དབྱངས་ཁྲོད།།
འདི་དང་ཕྱི་མའི་ལམ་ཞིག་ཡོད་ན་དག་པའི་ཞིང་ཞེས་གནས་མཆོག་ན།།
རྒྱུ་འབྲས་རློམ་པའི་སེམས་པ་འདི་ཀོ་སྐད་ཅིག་ཉིད་དུ་འདྲེན་པར་ཤོག།
No comments:
Post a Comment