གས་ཆག་བར་གྱི་ཨག་སྐད། ལྡན་མ་ཐུབ་བསྟན་དངོས་གྲུབ། འབྲས་བློ་གླིང་།

མཁོ་དགུ་ལོངས་སྤྱོད་ཀླུ་དབང་བྱེ་བརའགྲན་བཟོད་ཐུབ་པའི་འདོད་འཇོ་དང་།
མཛེས་སྡུག་བཀོད་པས་སུམ་རྩེན་ཡུལ་ལ་སྐྱེངས་པ་སྟེར་ནུས་སྐྱེ་རྒུའི་གྲོང་།།
འབྱུང་བཞི་འཁྲུགས་པའི་ཡོ་ལང་ཞིག་གིས་སྐད་ཅིག་ཐང་ཅིག་ཡུད་ཙམ་ལ།།
མི་སྡུག་མྱ་ངམ་ཐང་ཆེན་བསྒྱུར་བའི་སྒྱུ་མའི་ཟློས་གར་གསོན་པོ་ཞིག།

ཚན་རིག་འཕྲུལ་གྱི་གློག་རྡུལ་བརྒྱུད་ནས་འདྲེན་བྱེད་ཟུང་ལ་མངོན་པའི་ཚེ།།
བསམ་གཞིགས་རྒོད་པོ་བྲན་དུ་བཀོལཏེ་ཕྱི་མིག་སྒ་ལུང་རུ་བཞིར་ཤོར།།
སྔོན་གྱི་མཛེས་སྡུག་ཡིད་ལ་ཤར་བས་འདི་ལྟར་བདེན་ནམ་སོམ་ཉི་ངང་།།
མིག་མཐའི་མཆི་མ་འཕྱི་བཞིན་འཕྱི་བཞིན་མིག་ཟུང་གློག་ཀླད་ངོས་སུ་བགྲད།།

ཇི་ཙམ་བལྟས་ཀྱང་ཞིག་རལ་ཞིག་དང་ཤི་བོ་མ་གཏོགས་མི་འདུག་པས།།
སྐྱོ་གདུང་ཚོར་བས་ལུས་ཁམས་དཀྲུགས་ཏེ་སྙིང་གི་འཕར་རྩ་འགག་པའི་མོད།།
དྲ་ཁང་ནང་དུ་ཆུ་ཚོད་ཁ་ཤས་དྲན་མེདངང་དུ་འགྱེལ་ན་ཡང་།།
ལུས་སྲོག་གྱེས་པའི་ལས་ཀྱི་དབུ་ཁྱུད་འབྲི་རན་མིན་པས་བསྐྱར་དུ་སོས།།

སྲོང་བཙན་རྗེ་བོས་ནན་གྱིས་བསྐུལ་པའི་འགྱོག་ཆེན་གདོང་རིའི་དངོས་གྲུབ་དང་།།
ཨ་ཅག་ཀོང་ཇོས་འཕྲུལ་གྱིས་དྲངས་པའ་རྣམ་པ་སྣང་མཛད་བྱིན་རླབས་དག།
ཅི་ཡང་མ་ཕན་གང་ཡང་མ་ནུས་འདི་འདྲའི་གོད་ཆག་ཤོར་བ་འདིས།།
བདག་གི་ཡོད་ཚད་མིག་ཆུར་བསྒྱུར་ཅིང་མིག་ཆུ་ཡོད་ཚད་ཁྲག་ལ་འདྲེས།།