ཀླུ་སྒྲུབ་གཞུང་ལུགས་མཚོ་ཆེན་ངོགས།། གུས་རྟག་སྦྱོར་བ་ཡུན་བསྲིངས་ནས།། གཞུང་དོན་ནོར་བུ་ཀེ་ཏ་ཀ། ཐོབ་པར་འདོད་ཕྱིར་སུས་མི་བརྩོན།།
དཔལ་ལྡན་ཟླ་བ་གྲགས་པས་འཇུག་པ་ལས།། རབ་རིབ་དང་ལྡན་དབང་པོ་ཅན་མཚུངས་པ།། ཆུ་འབབས་ཀླུང་ལ་ཡི་དྭགས་རྣག་བློ་ཡང་།། ཞེས་གསུངས་པ་དང་། བཤེས་སྤྲིངས་ལས། ཡི་དྭགས་རྣམས་ལ་སོས་ཀའི་དུས་སུ་ནི།། ཟླ་བའང་ཚ་ལ་དགུན་ནི་ཉི་མའང་གྲང་།། ལྗོན་ཤིང་འབྲས་བུ་མེད་འགྱུར་དེ་དག་གིས།། བལྟས་པ་ཙམ་གྱིས་ཀླུང་ཡང་སྐེམས་པར་འགྱུར།། ཞེས་སོགས་ཀྱི་སྐབས་སུ་རང་བློར་གང་ཤར་གྱི་དོགས་གཅོད་ཉུང་ངུ་ཞིག་བྱས་ན། ལྷ་མི་ཡི་དྭགས་གསུམ་གྱིས་བརླན་ཞིང་གཤེར་བ་ཕོར་པ་གང་ལ་གཅིག་ཅར་དུ་བལྟས་པའི་ཚེ་ལྷ་ཡི་མིག་ཤེས་ཀྱིེས་བརླན་ཞིང་གཤེར་བ་ཕོར་པ་གང་དེའི་ཆ་ཤས་སུ་གྱུར་པའི་བདུད་རྩི་དང་། མི་ཡི་མིག་ཤེས་ལ་ཆུ་རང་ག་བ་དང་། ཡི་དྭགས་ཀྱི་མིག་ཤེས་ལ་རྣག་ཁྲག་ཏུ་མཐོང་བ་ནི་ལས་དབང་གིས་ཡིན་ཞེ་ན། འོ་ན། སྐལ་ལྡན་གྱི་གང་ཟག་ཞིག་དང་ལྷན་བྱིན་གཉིས་ཀྱིས་གཅིག་ཅར་ཏུ་བདག་ཅག་གི་སྟོན་པའི་སྐུ་གཟུགས་ལ་མཇལ་བའི་ཚེ་སྔ་མས་སྐྱོན་དང་བྲལ་ཞིང་ཡོན་ཏན་ཀུན་ལྡན་གྱི་གོང་བུ་ཞིག་ཏུ་མཐོང་ནས་དད་པ་དང་གུས་པ་སོགས་སྐྱེ་བ་དང་། ལྷས་བྱིན་གྱིས་དེ་ལས་ལྡོག་ཏེ་སྐྱོན་གྱི་གོང་བུ་ཞིག་ཏུ་མཐོང་བ་འདི་ཡང་བལྟ་བ་པོའི་ལས་དབང་གི་ཡིན་ནོ་ཞེས་ཁས་ལེན་དགོས་པར་འགྱུར་ཞིང་། དེ་ལྟར་ན་ཕྱི་མས་མཐོང་བ་ལྟར་གྱི་སྐྱོན་ཞིག་སངས་རྒྱས་རང་སྟེང་དུ་ཡོད་དགོས་ན་དེ་ཡང་མི་འཐད་དེ། སྐྱོན་གྱི་རིགས་སངས་པ་དང་། ཡོན་ཏན་གྱི་རིགས་ཡོངས་སུ་རྒྱས་པའི་སངས་རྒྱས་ཀྱི་སྒྲ་དོན་ཡང་ཉམས་པར་འགྱུར་ལ། རང་སྟེང་དུ་སྐྱོན་གྱི་རིགས་མེད་ན་གང་ཟག་གཉིས་པོ་དེ་ལ་སྣང་ཚུལ་ཐ་དད་པ་མེད་པར་ཐལ་བ་དང་། ལྷ་མི་ཡི་དྭགས་གསུམ་གྱི་མཐོང་ཚུལ་ཐ་དད་པ་ལས་དབང་གི་ཡིན་པའི་ཁས་ལེན་ཉམས་སོ། གཞན་ཡང་། མཐོང་ཚུལ་ཐ་དད་པ་དེ་འདྲ་མེད་ན་ཆ་ཅན་རི་རབ་གཅིག་ལ་དུས་འཁོར་གྱི་ཆེད་དུ་བྱ་བའི་གདུལ་བྱ་དང་། མངོན་པའི་ཆེད་་བྱ་བའི་གདུལ་བྱ་གཉིས་ཀྱི་བལྟས་པ་ན་ཟླུམ་པོ་དང་གྲུ་བཞི་སོ་སོར་མི་སྣང་བར་ཁས་ལེན་དགོས་ན་དེ་ཡང་མི་རིགས་སོ། གཞན་ཡང་། གོང་དུ་བཤད་པ་དེ་དག་ལས་དབང་གི་དེ་ལྟར་སྣང་བར་འདོད་ན། ལས་དབང་མི་འདྲ་བའི་གང་ཟག་གསུམ་གྱི་གསེར་ཕྱེ་སྡེར་མ་གང་ལ་བལྟ་བའི་ཚེ་གང་ཟག་དང་པོ་ལ་གསེར་བཙོ་མ་སྡེར་གང་དང་། གང་ཟག་གཉིས་པ་ལ་རག་ཕྱེ་སྡེར་གང་དང་། གང་ཟག་གསུམ་པ་ལ་བྱེ་མ་སྡེར་མ་གང་ལྟ་བུར་མཐོང་བ་ཡོད་པར་ཐལ་བ་སུས་ཀྱང་བཟློག་མི་ནུས་སྙམ་པས་དཔྱོད་ལྡན་དག་གིས་ཞིབ་ཏུ་དཔྱོད་ཅིག
No comments:
Post a Comment