ལོ་ནག་གཉིས་འཁོར་བ།
དེ་རིང་མདོ་ཁམས་སྐྱེ་རྒུ་མདོ་རུ་ས་ཡོམ་གྱིས་མི་རྒྱུ་ཟོག་གསུམ་ལ་གནོད་སྐྱོན་ཚབས་ཆེན་ཕོག་ནས་མི་ལོ་གཉིས་ཐམ་པ་ཏག་ཏག་འཁོར་བའི་ཉིན་མ་ཞིག་རེད། དེ་རིང་དྲ་ངོས་འཕྲིན་ལམ་མང་པོ་ཞིག་ཏུ་རང་བྱུང་གིས་བཤིགས་པའི་ཡུལ་གྲུ་དེར། ཁ་སང་གི་སྡུག་བསྔལ་གྱི་མུན་པ་སངས་ཞིང་། བདེ་སྐྱིད་ཀྱི་ཉི་མ་ཐོང་གིས་བསུ་བཞིན་ཡོད་པ་ཕྱོགས་ཀུན་དྲིལ་བསྒྲགས་བཞིན་ཡོད། དྲིལ་བསྒྲགས་འདི་དག་བདེན་པའི་ཐོག་ཏུ་འབབ་མིན་དེ་ནི་ལས་མཇུག་ཏུ་སྡོམ་ཚིག་བཀོད་རྒྱུ་ལས་དེ་རིང་མ་འོངས་པའི་སྐད་ཆ་ཚོད་དཔག་ཁག་བྱེད་དཀའ་བའི་གནས་སུ་གྱུར་ཡོད། དེ་དག་ནི་འབྱུང་འགྱུར་གྱི་གནད་དོན་སྐོར་རེད། དེ་རིང་རྗེས་དྲན་གྱི་དུས་ཚིགས་ངན་པ་འདི་ཉིད་དྲན་གསོ་བྱེད་པའི་སྐབས་སུ་ཅི་ཞིག་བློ་ངོར་དུ་དྲན་ཡོང་བ་དང་། གང་ཞིག་མིག་ལམ་དུ་འཆར་འོངས་པ་རེད་ཅེ་ན། དེ་ནི་གནམ་ས་རལ་བའི་འཇིག་ཤུལ་དུ་ཤི་རྨས་ཀྱི་དུར་ས་ཆེན་པོ་འདི་རུ། མདོ་དབུས་ཁམས་གསུམ་ནས་འོངས་བའི་རོགས་རམ་པ་སྤྱི་དང་། ལྷག་པར་འཇོར་དང་ལྕགས་ཁེམ་བཟུང་བའི་གྲྭ་རྒོད་དཔུང་རྗེན་མ་སྐོར་ཞིག་གིས་རྔུལ་ཆུ་དང་མིག་ཆུ་བསྲེས་ཤིང་། ཤི་གསོན་གྱི་དབྱེ་འགྱེད་ཆེན་པོ་ཞིག་དང་། གནམ་ས་སོ་སོར་ཕྱེས་པའི་ལོ་རྒྱུས་ཀྱི་མཚོན་རིས་ཞིག་མིག་ལམ་དུ་ཤར་འོང་བ་དེའོ།
No comments:
Post a Comment