ཡུལ་ཤུལ་ས་འགུལ་བྱུང་ནས་ལོ་འཁོར་གཅིག་ལོན་པའི་རྗེས་དྲན་དུ།
དཔལ་འབྱོར་བྱིན་བྱིན་ཚང་མ་སྙིང་རྗེ་བ་མིན་ལ།།
ས་འགུལ་བྱུང་བ་ཏག་ཏག་ཡུལ་ཤུལ་བ་མིན་པས།།
ས་ཡི་རླབས་ཕྲེང་མི་ཡི་ནང་སེམས་ཀྱི་དབུས་ན།།
གཡོ་དང་རྫུན་གྱི་བརྩམས་ཆོས་སྒྲིག་མཁན་ཡང་མོད་དོ།།
ས་ཡི་གཡོ་འདར་མི་ཡི་ཧམ་སེམས་ཀྱི་ཕུགས་ནས།།
ཚེ་སྲོག་ཁྲག་ལ་རྫུས་པའི་ལོ་ཟླ་ཞིག་བྱུང་ཞིང་།།
ཚིག་གི་མཐའ་མ་མིག་གི་མཆི་མ་འདི་འདོན་ཞོར།།
ཉི་མ་སུམ་བརྒྱ་དྲུག་བཅུ་འདི་ལྟར་དུ་ཤོར་སོང་།།
དགའ་སྐྱོ་ཆགས་སྡང་འདུ་བྲལ་ཆོས་ཉིད་ཀྱི་འཁོར་ལོ།།
གློ་བུར་ས་འགུལ་བྱུང་བ་རང་བྱུང་གི་ཆག་འཇིག།
སྐྱེ་དགུ་མདོ་ལ་བྱུང་བ་ཚེ་སྲོག་གི་སྡོམ་བྱང་།།
ང་ཡི་སྤུན་ཟླ་འདས་པ་མནར་སྡུག་གི་ཕུ་ཁུང་།།
མ་སྐྱོ་མ་སྡུག་མ་ངུ་ཚེ་གསོན་གྱི་ཡུལ་ཤུལ།།
མ་སྐྲག་མ་འཇིགས་མ་ཕམ་དྭ་ཕྲུག་དང་ཡུགས་མོ(ཕོ)།།
ང་ཚོས་མདུན་ལམ་གསར་བ་སྤོབས་པ་ཡིས་འཚོལ་དགོས།།
ང་ཚོས་བདེ་སྐྱིད་འཚོ་བ་ཡིད་ཆེས་ཀྱིས་སྙེགས་དགོས།།
རང་ཁྱིམ་འཐོར་བའི་དུས་ནས་སྐྱོ་བ་ནི་མང་ཡང་།།
གཞིས་ཁྱིམ་གསར་བའི་ནང་ནས་དྲོད་ཁོལ་ཞིག་བཙལ་དགོས།།
ཕ་མ་བུ་ཕྲུག་བོར་བའི་སྡུག་བསྔལ་ནི་ལྗི་ཡང་།།
བྱམས་ཀྱིས་སྐྱོང་བའི་མི་ལ་ནང་སེམས་ཤིག་སྟོན་དགོས།།
2011.4.14
སེང་རྡོར་དྲ་བ་ལས་དྲངས།
No comments:
Post a Comment