4.14ཁམས་སྐྱེ་རྒུའི་ས་ཡོམ་དོན་རྐྱེན་ལ་སྦྱར་བ།
དེ་རིང་ཡང་ནི་སྔར་ལོ་བཞིན་དུ་མྱ་ངན་ཚིག་ཐུང་འབྲི་ཁུལ་བྱེད། །
དེ་རིང་ཡང་ནི་སྔར་ལོ་བཞིན་དུ་སྙུན་འདྲིའི་གཏམ་ཡག་བརྗོད་ཁུལ་བྱེད། །
ཐུང་ལ་ཉུང་བའི་ཡི་གེ་འགའ་ལ་རེ་བ་ཡོངས་རྫོགས་བཅོལ་བ་ཡི། །
འཆི་རྐྱེན་ཟད་པའི་ལས་ངན་ཁོ་བོ་ད་དུང་གསོན་འདི་ངོ་རེ་ཚ། །
དེ་རིང་ ཡང་ནི་སྔར་ལོ་བཞིན་དུ་ལེགས་སྦྱར་རེ་གཉིས་འདོན་ཁུལ་བྱེད། །
དེ་རིང་ཡང་ནི་སྔར་ལོ་བཞིན་དུ་ལྕགས་གོང་རེ་གཉིས་བསྒྲོན་ཁུལ་བྱེད། །
མིག་སྤུའི་གསེབ་ཀྱི་ཆུ་ཟིལ་འགའ་ལ་གདུང་སེམས་མཉམ་སྐྱེད་འབོད་པ་ཡི། །
འཆི་རྐྱེན་ཟད་པའི་ལས་ངན་བདག་རང་ད་དུང་གསོན་འདི་ངོ་རེ་ཚ། །
རང་ བྱུང་ཁམས་ཀྱི་རྩེད་ཆས་ཡིན་པའི་མི་ཡི་རིགས་འདིས་ཅི་ཞིག་ནུས། །
ཉི་མ་གཅིག་ལ་འཛམ་གླིང་བསྣུབ་ཀྱང་བློ་དང་ཇུས་བཀོད་ཡེ་ནས་མེད། །
གཉོམ་ཆུང་བཏུལ་བའི་ཨ་ཕོ་མང་ཡང་གལ་ལ་ཐུག་དུས་ལག་རྡུམ་རྐྱང་། །
འཆི་རྐྱེན་ཟད་པའི་ལས་ངན་ཁྱོད་ཀྱང་ད་དུང་གསོན་འདི་ངོ་རེ་ཚ། །
རང་ བྱུང་ཁམས་ཀྱི་མཆན་ཤིག་ལྟ་བུའི་མི་ཡི་རིགས་འདིས་ཅི་ཞིག་ནུས། །
སེན་རྒན་གཉིས་ཀྱིས་ནམ་ཞིག་གཅིར་བ་ཁྱོད་ཀྱིས་བློ་ཚོད་ཨེ་ཐུབ་བམ། །
བཅུ་གཉིས་ཕྱི་མར་ཨ་རིའི་ཙུང་ཐུང་ས་ཡོམ་ཁྲོད་དུ་འགྱེལ་པའང་། །
འཆི་རྐྱེན་མང་བའི་རྐང་གཉིས་འོ་ཅག་སྡུག་ལ་ཐུག་པའི་རྣམ་ཐར་རེད། །
མི་ནི་ འདི་ལྟར་གྲོག་མ་བཞིན་དུ་ནམ་ཤི་ཆ་རུ་དཀའ་བ་དང་། །
ཚེ་ནི་འདི་ལྟར་མཆོད་མེ་བཞིན་དུ་གར་གཟིམ་འདིར་གཟིམ་མེད་པས་ན། །
རྗེས་དྲན་ཞེས་པའི་ཚིག་ཐུང་འགའ་ཡིས་སེམས་དང་སེམས་པ་སྦྲེལ་བ་ཡང་། །
ན་བའི་དུས་ཀྱི་སྦྲིད་སྨན་ཙམ་དུ་སྐྱེ་བོ་ང་ཅག་མཉམ་དུ་འཐུང་། །
སྐྱེ་ རྒུའི་གྲོང་གི་འདས་པོ་ཁྱོད་ཅག་དེ་ཙམ་བྲེལ་བྲེལ་མ་གནང་དང་། །
སྐད་མང་རིགས་མང་འགྲོ་བ་ཡོངས་རྫོགས་བྱ་ཁྱུ་བཞིན་དུ་འཕུར་ནས་འགྲོ །
བདེ་བ་ཅན་ཞིག་གཞི་ནས་མེད་ཀྱང་ཡོད་ཡོད་ཙམ་དུ་སྒོམས་ལ་སོང་། །
འོད་དཔག་མེད་ཅེས་སྐྱོབ་པ་མཆོག་ཅིག་སེམས་ཀྱི་གདན་ལ་གསལ་དུ་ཐོབས། །
༢༠༡༠.༤.༡༤ཉིན་གྱི་ཕྱི་དྲོའི་ཆུ་ཚོད་ལྔ་པ་ཙམ་ལ་ངུ་བཞིན་དུ་བྲིས།
༼གྲྭ་བཙུན་རྣམས་ལ་དཔལ་དར་འཐེན། ༽
དེ་རིང་ནི་རྩོད་པའི་འཐབ་མོ་མི་བཀྱེ་སྟེ། །
ཁུ་བ་དང་བཀའ་བསྡུའི་དོན་དག་མི་གླེང་སྟེ། །
བོད་ཡུལ་ནས་ལི་ཁྲིའི་རྦ་རླབས་འཕྱུར་བ་ལ། །
སྙིམ་པད་ཅིག་བྲང་གར་སྤྱར་ཏེ་གུས་འདུད་ཞུ། །
ཁུ་བ་དང་བཀའ་བསྡུའི་དོན་དག་མི་གླེང་སྟེ། །
བོད་ཡུལ་ནས་ལི་ཁྲིའི་རྦ་རླབས་འཕྱུར་བ་ལ། །
སྙིམ་པད་ཅིག་བྲང་གར་སྤྱར་ཏེ་གུས་འདུད་ཞུ། །
དེ་ལོ་ལ་དགྲ་བཅོམ་ཁྱོད་ཚོ་ཅི་བས་མཚར། །
གངས་སུལ་ལ་གཤིན་རྗེ་གཤེད་ཀྱི་ན་བུན་གཏིབས། །
ད་རེས་ཀྱང་ཉན་ཐོས་ཁྱོད་ཚོ་ཨེ་ཧོ་སྟོབས། །
ཡུལ་ཤུལ་ལ་ཕྱག་སྟོང་མགོན་གྱི་བརྩེ་བ་བཅུས། །
གངས་སུལ་ལ་གཤིན་རྗེ་གཤེད་ཀྱི་ན་བུན་གཏིབས། །
ད་རེས་ཀྱང་ཉན་ཐོས་ཁྱོད་ཚོ་ཨེ་ཧོ་སྟོབས། །
ཡུལ་ཤུལ་ལ་ཕྱག་སྟོང་མགོན་གྱི་བརྩེ་བ་བཅུས། །
རང་སྡེ་ལ་གཅིག་ཏུ་ཞེན་པའི་གྲྭ་པ་ཚོ། །
སྲིད་པ་ཡི་སྡིངས་ཆ་ཡིན་པ་ད་རེས་ཤེས། །
རང་རིགས་ཀྱི་ཁོག་དཔུང་འཛིན་པའི་གྲྭ་པ་ཚོ། །
འཁོར་པ་ཡི་སྒོ་གླེགས་ཡིན་པ་ད་རེས་རྟོགས། །
སྲིད་པ་ཡི་སྡིངས་ཆ་ཡིན་པ་ད་རེས་ཤེས། །
རང་རིགས་ཀྱི་ཁོག་དཔུང་འཛིན་པའི་གྲྭ་པ་ཚོ། །
འཁོར་པ་ཡི་སྒོ་གླེགས་ཡིན་པ་ད་རེས་རྟོགས། །
ཆགས་སྡང་གི་རུས་པ་ཐོན་པའི་ངུར་སྨུག་སྡེ། །
སངས་རྒྱས་ཀྱི་དཔའ་རྟུལ་ཨེ་ཡིན་མ་ཤེས་ཀྱང་། །
ཐུ་བྷོད་ཀྱི་གོ་དམག་ཡིན་པ་སུ་ཞིག་བསྙོན། །
བཙན་རྒོད་ཀྱི་གདུང་རབས་ངོ་མར་བདག་གིས་བསྔགས། །
སངས་རྒྱས་ཀྱི་དཔའ་རྟུལ་ཨེ་ཡིན་མ་ཤེས་ཀྱང་། །
ཐུ་བྷོད་ཀྱི་གོ་དམག་ཡིན་པ་སུ་ཞིག་བསྙོན། །
བཙན་རྒོད་ཀྱི་གདུང་རབས་ངོ་མར་བདག་གིས་བསྔགས། །
དགྲ་གཉེན་གྱི་མཇིང་པ་སྦོས་པའི་དམར་སེར་དཔུང་། །
བདེ་གཤེགས་ཀྱི་ཉ་མ་ཨེ་ཡིན་མ་ཤེས་ཀྱང་། །
ཕ་ཕོག་གི་ནང་སྲུང་ཡིན་པ་ཁོ་ཐག་རེད། །
དུས་མཐའ་ཡི་སྡེ་ཤོག་ཆེན་པོར་ཁོ་བོས་བསྟོད། །
བདེ་གཤེགས་ཀྱི་ཉ་མ་ཨེ་ཡིན་མ་ཤེས་ཀྱང་། །
ཕ་ཕོག་གི་ནང་སྲུང་ཡིན་པ་ཁོ་ཐག་རེད། །
དུས་མཐའ་ཡི་སྡེ་ཤོག་ཆེན་པོར་ཁོ་བོས་བསྟོད། །
དགའ་སྡུག་གི་ལ་མོ་རྒྱག་པ་འཕགས་པའི་ཚོགས། །
སྟོན་པ་ཡི་གཏད་རབས་ཨེ་ཡིན་མ་ཤེས་ཀྱང་། །
ཆོལ་གསུམ་གྱི་ཁ་འཛིན་ཡིན་པ་ཏན་ཏན་རེད། །
མི་རབས་ཀྱི་སྙིང་སྟོབས་གསོན་པོར་ང་ཡིས་འབོད། །
སྟོན་པ་ཡི་གཏད་རབས་ཨེ་ཡིན་མ་ཤེས་ཀྱང་། །
ཆོལ་གསུམ་གྱི་ཁ་འཛིན་ཡིན་པ་ཏན་ཏན་རེད། །
མི་རབས་ཀྱི་སྙིང་སྟོབས་གསོན་པོར་ང་ཡིས་འབོད། །
གནའ་དུས་ཀྱི་ཁ་བོ་ཆེ་དང་སྣ་བོ་ཆེ། །
ད་དུང་ཡང་སྐན་སྒྲ་ཐག་གེར་ཡོད་པ་དགའ། །
སེམས་གཏིང་ལ་ལ་རྒྱ་འཁྲིགས་པའི་དཔུང་ཆེན་ཁྱོད། །
རི་རབ་ཀྱི་ཁོང་གསེང་འཛིན་པའི་བྱ་ཁྱུང་འདྲ། །
ད་དུང་ཡང་སྐན་སྒྲ་ཐག་གེར་ཡོད་པ་དགའ། །
སེམས་གཏིང་ལ་ལ་རྒྱ་འཁྲིགས་པའི་དཔུང་ཆེན་ཁྱོད། །
རི་རབ་ཀྱི་ཁོང་གསེང་འཛིན་པའི་བྱ་ཁྱུང་འདྲ། །
ཁྱད་པར་དུ་སྐྱེ་རྒུའི་གྲོང་ལ་དཔའ་རྟགས་བཞག །
ཡང་སྒོས་སུ་བཀྲ་ཤིས་དར་ཐང་བྱིན་གྱིས་བརླབས། །
སྨིན་མཚམས་ལ་འཁྱོག་མདུད་བརྒྱབ་པའི་སྟག་ཤར་ཏེ། །
བྱང་རྒྱུད་ཀྱི་འདུས་སྡེ་ཁྱོད་ཅག་བཀུར་བར་བྱ། །
ཡང་སྒོས་སུ་བཀྲ་ཤིས་དར་ཐང་བྱིན་གྱིས་བརླབས། །
སྨིན་མཚམས་ལ་འཁྱོག་མདུད་བརྒྱབ་པའི་སྟག་ཤར་ཏེ། །
བྱང་རྒྱུད་ཀྱི་འདུས་སྡེ་ཁྱོད་ཅག་བཀུར་བར་བྱ། །
ཙོང་ཁ་པས་རི་ལམ་དེད་དང་འདྲ་ལེ་མིན། །
ཞབས་དཀར་པས་མཚོ་ཁུག་ཉུལ་དང་མཚུངས་ལེ་མིན། །
གྲུ་ཁྱེམ་དང་ཏོག་ཙེ་བསྣམས་པའི་ཨ་ཁུ་ཚོས། །
སྐབས་དོན་གྱི་སྦྱོར་བ་བརྩམས་པ་ཡི་གར་འོང་། །
ཞབས་དཀར་པས་མཚོ་ཁུག་ཉུལ་དང་མཚུངས་ལེ་མིན། །
གྲུ་ཁྱེམ་དང་ཏོག་ཙེ་བསྣམས་པའི་ཨ་ཁུ་ཚོས། །
སྐབས་དོན་གྱི་སྦྱོར་བ་བརྩམས་པ་ཡི་གར་འོང་། །
དཔུང་པ་ཡི་ཤ་རྒོད་འཕག་པའི་ཕོ་རབ་སྟེ། །
གདེང་ཚོད་ཀྱི་བྲང་ག་ཕྱེས་པའི་ཕོ་རབ་སྟེ། །
དཀའ་ངལ་ལ་གདོང་གིས་བསུ་བའི་ཕོ་རབ་སྟེ། །
གྲྭ་པ་ཚོར་མི་དྲི་བྲོ་བ་གཞན་ལས་ཐུ། །
གདེང་ཚོད་ཀྱི་བྲང་ག་ཕྱེས་པའི་ཕོ་རབ་སྟེ། །
དཀའ་ངལ་ལ་གདོང་གིས་བསུ་བའི་ཕོ་རབ་སྟེ། །
གྲྭ་པ་ཚོར་མི་དྲི་བྲོ་བ་གཞན་ལས་ཐུ། །
ལུགས་མཐུན་གྱིས་ཡ་ལན་སྤྲོད་ལ་ཁྲོ་བོ་སྟེ། །
གསོད་གཏུབ་ཀྱི་རལ་ཁ་འགྲན་ཀྱང་ཆོག་པར་འདུག །
དཔལ་རྡོར་གྱིས་ཐོག་མ་དྲངས་པའི་གྲྭ་དམག་འདི། །
རྟུལ་ཕོད་ཀྱི་སྡེ་ཞིག་ཡིན་པ་སྦེད་རྒྱུ་མེད། །
གསོད་གཏུབ་ཀྱི་རལ་ཁ་འགྲན་ཀྱང་ཆོག་པར་འདུག །
དཔལ་རྡོར་གྱིས་ཐོག་མ་དྲངས་པའི་གྲྭ་དམག་འདི། །
རྟུལ་ཕོད་ཀྱི་སྡེ་ཞིག་ཡིན་པ་སྦེད་རྒྱུ་མེད། །
ཚད་མེད་ཀྱིས་ལག་རྡང་སྦྲེལ་ལ་ཞི་བ་སྟེ། །
སྤྱན་ཆབ་ཀྱི་ལོ་ཟིལ་འཐོར་ཀྱང་ཆོག་པར་འདུག །
ཡིག་དྲུག་གིས་རུ་དར་འཕྱར་བའི་གྲྭ་དམག་འདི། །
བརྩེ་བ་ཡི་འོད་ཅིག་ཡིན་པ་དགབ་རྒྱུ་མེད། །
སྤྱན་ཆབ་ཀྱི་ལོ་ཟིལ་འཐོར་ཀྱང་ཆོག་པར་འདུག །
ཡིག་དྲུག་གིས་རུ་དར་འཕྱར་བའི་གྲྭ་དམག་འདི། །
བརྩེ་བ་ཡི་འོད་ཅིག་ཡིན་པ་དགབ་རྒྱུ་མེད། །
ངན་འགྲོ་དང་བདེ་འགྲོ་སོགས་ཀྱིས་མི་འཚེངས་མོད། །
རིགས་ཞེན་དང་ལར་ཞེན་སོགས་ཀྱིས་ལོས་ཀྱང་འཚེངས། །
ཆེ་བ་དེར་ཆེ་བའི་ངོས་ནས་བསྟོད་པར་བྱ། །
ཆེ་བ་དེར་འཁོར་པའི་ངོས་ནས་བསྔགས་པར་བྱ། །
རིགས་ཞེན་དང་ལར་ཞེན་སོགས་ཀྱིས་ལོས་ཀྱང་འཚེངས། །
ཆེ་བ་དེར་ཆེ་བའི་ངོས་ནས་བསྟོད་པར་བྱ། །
ཆེ་བ་དེར་འཁོར་པའི་ངོས་ནས་བསྔགས་པར་བྱ། །
ཆེ་བ་འདི་ཆོས་ཀྱི་སྒང་ལ་དཀྲི་ཚོད་མེད། །
ལྷག་པར་དུ་མྱང་འདས་སྣོད་ལ་བཅུག་ཚོད་མེད། །
མི་ཚུལ་གྱི་རྒྱ་མར་གཞལ་ན་རན་རན་ཡིན། །
རྒྱ་རྡོ་དང་རྒྱ་མིག་གཉིས་ལ་ནོར་འཛོལ་མེད། །
ལྷག་པར་དུ་མྱང་འདས་སྣོད་ལ་བཅུག་ཚོད་མེད། །
མི་ཚུལ་གྱི་རྒྱ་མར་གཞལ་ན་རན་རན་ཡིན། །
རྒྱ་རྡོ་དང་རྒྱ་མིག་གཉིས་ལ་ནོར་འཛོལ་མེད། །
གཞན་དུ་ན་རིག་པས་བརྟགས་ན་ཡ་རེ་ཆ། །
བདག་མེད་ཀྱི་ཐིག་ཤིང་བརྒྱབ་ན་བློ་རེ་འཕམ། །
དེ་དོན་ཀྱང་ཟུར་ཞུ་ཡིན་པས་སྙན་ལ་ཞོག །
གཏམ་ལྷག་གིས་འོ་བརྒྱལ་བྱེད་ན་དགོངས་པར་མཐོལ། །
བདག་མེད་ཀྱི་ཐིག་ཤིང་བརྒྱབ་ན་བློ་རེ་འཕམ། །
དེ་དོན་ཀྱང་ཟུར་ཞུ་ཡིན་པས་སྙན་ལ་ཞོག །
གཏམ་ལྷག་གིས་འོ་བརྒྱལ་བྱེད་ན་དགོངས་པར་མཐོལ། །
No comments:
Post a Comment